Петропавлда бір отбасын өлтіргендерге қатысты сот жаңа үкім шығарды

ПЕТРОПАВЛ. KAZINFORM — Петропавлда ерлі-зайыпты мен олардың 17 жастағы ұлын өлтірген үш азаматқа қатысты жаза қатаңдатылды.

Солтүстік Қазақстан облыстық сотының апелляциялық сатысы сотталғандардың, жәбірленушінің апелляциялық шағымдары және прокурордың өтініші бойынша Приходченколар отбасын өлтіруге қатысты қылмыстық істі қарады.

Естеріңізге салайық, оқиға 2023 жылы желтоқсан айының соңында болған еді. Емельянов пен Орлов алдын ала жоспарлап, жерлеу рәсімдерімен айналысатын кәсіпкер Вадим Приходченко мен әйелі Юлия және олардың кәмелетке толмаған баласы Юрийді өлтіріп, үйлерін тонап кеткен еді.

Олардың сыбайласы Скоробогатова отбасыны өлтіргенін білгенімен, бұл туралы құқық қорғау органдарына хабарламаған. СҚО қылмыстық істер жөніндегі мамандандырылған ауданаралық соты келесідей үкім шығарды.

Емельяновты өмір бойына бас бостандығынан айырып, жазасын қылмыстық атқару жүйесінің төтенше қауіпсіздік мекемесінде өтеуге; Орловты 21 жыл 8 айға бас бостандығынан айырып, ҚАЖ орта қауіпсіздік мекемесінде жазасын өтеуге; Скоробогатованы 3 жылға бас бостандығынан айырып, ҚАЖ орташа қауіпсіздік мекемесінде жазасын өтеуге үкім шығарды.

Алайда, Приходченколардың қызы Татьяна бұл жаза тым жеңіл деп есептеп, әлеуметтік желіде қоғамнан және құқық қорғау органдарынан әділдік сұрады. 

СҚО сотының қылмыстық істер жөніндегі апелляциялық алқасы соттың алғашқы үкімін өзгертті.

— Емельяновтың жазасы сол күйінде қалды, Орлов жазасын 23 жыл өтесе, Скоробогатованың бас бостандығынан айыру мерзімі 4 жылға дейін ұзартылды, — делінген хабарламада.

Сот шешімі заңды күшіне енді.

Бұған дейін СҚО-да екі ай ішінде 160-қа жуық адам жануарлардан зардап шеккенін жазған едік.