Петропавлда дәрігерлер жас жігіттің жүрегінен темір тікенді алып шықты
ПЕТРОПАВЛ. KAZINFORM — Петропавлда жол-көлік апатында жарақаттанған жігітті дәрігерлер аман алып қалды. Ота барысында оның жүрегінде темір тікен тұрғандығы анықталған.

Петропавлдағы көпбейінді қалалық аурухананың мәліметінше, жол-көлік оқиғасында автокөліктің дөңгелегі жарылып, 22 жастағы жігіт ауыр халде ауруханаға жеткізілген. Сол күнгі кезекші дәрігер-хирургтер Руслан Захаров, Алексей Дрюпин, анестезиолог Эльдар Рамазанов бірден ота жасауға кірісіп, науқастың өмірі үшін күресті бастайды.

Тексеру кезінде дәрігерлер жігіттің кеуде қуысы жарақатын көреді. Өкпесінің оң жағындағы жараны, диафрагманы, зақымданған бауырды тігеді. Алайда, көкірек бөлігінде гематома пайда болып, қарап-тексеру кезінде жүректің жарақаттанғаны анықталды. Нәтижесінде дәрігерлер жүрек ішінен дөңгелектің темір тікенін тауып алып, жараларды тікті. Осылайша, операция шамамен 2 сағатқа созылды. Науқас бір литр қан жоғалтты.
Жансақтау бөлімінде бес күн жатқан науқас кейін өздігінен тыныс алып, жағдайы тұрақтанды. Жағдайы жақсарғаннан кейін үйіне жіберілді.
— Мен бастапқыда не болғанын түсінбедім, тек ауырсынып, от қарығандай болды. Бірнеше күннен кейін ғана, есімді жинағасын өлім аузынан қалғанымды түсіндім, — дейді жігіт.
Бұған дейін СҚО-да қашып жүрген сотталған орманда жеркепеде жасырынғанын жазған едік.