Петропавлда еліміздегі қағаз өндірушілер біліктілігін арттырып жатыр

ПЕТРОПАВЛ. KAZINFORM – Петропавлда Қазақстанның 5 кәсіпорнынан 25 маман қысқамерзімді курсқа қатысып, қағаз өндірісіне қатысты білімдерін жетілдіре түсуде. 

Солтүстік Қазақстан облысы кәсіпкерлер палатасы баспасөз қызметінің мәліметінше, 2017 жылы «Радуга» ЖШС жанынан «Профресурс» орталығы ашылды. Бұл – қағаз өндірісі бойынша қысқамерзімді оқытуды жүзеге асыратын елдегі жалғыз оқу орны. Кәсіпкерлер палатасының қолдауымен ашылған орталық «Атамекен» Ұлттық кәсіпкерлер палатасының тізілімінде тұр.

«Профресурс» оқу орталығы 7 жыл ішінде пластмасса құюшыларды, автоматты желі операторларын, дәнекерлеушілерді, машинистерді және басқа да сұранысқа ие мамандарды даярлап келеді. 

«Биыл орталық сұранысқа ие екі жаңа мамандықты қосып, біліктілік тізімін жаңартты. Бұл – қағаз бен картон өндірісінің және орама қағаз, басқа да қағаз өнімдерін шығарудың операторлары. Қазіргі уақытта Қазақстандағы осындай мамандарды даярлайтын орталық тек Петропавлда ғана бар екенін атап өткен жөн», - дейді СҚО кәсіпкерлер палатасының сарапшысы Ирина Торопова. 

Курсқа Астана мен Шымкенттен қағаз өндіруші 4 компанияның өкілдері арнайы келді. 

«Мен өзім де оқимын және 4 маманды жаныма ерте келдім. Қызметкерлеріміз білім алуға дайын, өйткені елімізде мұндай қажетті білімді алу қиын. Жоғарғы оқу орындарында мұндай әдісті үйретпейді, ол үшін Ресейге бару керек. Біз біліктілігі жоғары профессорлардан білім алатынымызға қуаныштымыз», - дейді Астанадағы «Goida.kz» ЖШС директорының орынбасары Нұрлан Закарьянов.

Бір ай бойы күніне 7 сағат «Профресурс» оқу орталығында целлюлоза-қағаз өндірісінің мамандарымен Орал мемлекеттік орман техникалық университетінен арнайы шақырылған оқытушылар айналысады. 

«Целлюлоза-қағаз өндірісі, қағаз алу технологиясына қатысты білім беріп жатырмыз. Мұнда негізінен ағаштың морфологиялық құрылымын қарастырамыз,  дайын кесектерін микроскоппен көрсетіп, әртүрлі ағаш талшықтарының негізгі анатомиялық элементтерімен танысамыз. Мен целлюлозаны алауан тәсілдермен өңдеудің толық циклі туралы айтамын», - дейді Екатеринбург қаласындағы Орал мемлекеттік орман техникалық университетінің профессоры Олеся Вураско.

Естеріңізге сала кетейік, «Радуга» ЖШС Петропавлда қағаз бұйымдар фабрикасын 2022 жылдың қазан айында іске қосты. Қазіргі уақытта зауыт санитарлық-гигиеналық мақсаттағы тауарларды – майлықтарды, қағаз сүлгілерді, дәретхана қағазын және А4 кеңсе қағазының екі түрін шығарып, толық қуатта жұмыс істейді. 

«Бүгінде қағаз бұйымдар фабрикасында 60 адам еңбек етіп жатыр. Бізге қызметкерлердің біліктілігін арттыру, инженерлерді, цех бастықтарын, заманауи жабдықта жұмыс істей алатын мамандарды даярлау маңызды. Әріптестеріміздің білмекке ұмтылғанын қалаймыз. Қазіргі кезде мектепті басқаруға алып, кейін оны мектеп-колледжге айналдырдық. Түлектерге жүз пайыз жұмысқа орналасуға кепілдік береміз. Біз қағаз саласының мамандарына мемлекеттік үлгідегі дипломдар беруді қолға алып жатырмыз. Осы мақсатқа жету жолында оқу орталығы жанынан қағаз өндірісі бойынша мамандарды қысқа мерзімді даярлауды бастадық. Бұл – кадрларды кәсіби даярлауды ұйымдастырудағы алғашқы тәжірибеміз. Сала бойынша серіктестерімізді тартып, жақсы білім беретін профессорларды шақырдық», - дейді «Радуга» ЖШС Бас директорының орынбасары Дәурен Катранов.

Бұған дейін СҚО-да қандай мамандар сұранысқа ие екенін жазған едік.