Петропавлда қазақ күресінен Қожаберген жырау атындағы республикалық турнир өтіп жатыр

ПЕТРОПАВЛ. KAZINFORM — Петропавлда қазақ күресінен өтіп жатқан республикалық турнирге 320 спортшы қатысып жатыр.

Солтүстік Қазақстан облысы дене шынықтыру және спорт басқармасы баспасөз қызметінің мәліметінше, жарыста жергілікті және еліміздің 10 аймағынан келген балуандар 10 салмақ дәрежесі бойынша күш сынасады. 

Жарыс 2010 және 2011 жылы туған жасөспірімдер арасында ұйымдастырылған. 

— Турнир екі күнге шақталған. Жеңімпаздар ҚР спорт шеберіне үміткер атағына ие болады. Бұл турнир биыл жетінші рет өтеді. Қазақ күресін өңірде дамыту мақсат етілген. Келген балуандардың арасында ел чемпиондары да бар, — дейді қазақ күресінен СҚО-ның жасөспірімдер арасында аға жаттықтырушысы Асылхан Болатов.

Жарыстың алғашқы күні балуандар 38, 46, 55, 65 және 75 келі салмақ дәрежелері бойынша күресті. 

Петропавлдық балуан Айдарбек Бұлановтың күреспен айналысып жүргеніне 3 жыл. 

— Жарысқа көп дайындалдым. Бұған дейін Астанада өткен Super Cup деген жарысқа қатысып, екінші орын алдым, сосын чемпиондар лигасына қатыстым. Бүгін ақмолалық балуанмен белдестім. Мықты спортшы екен, әрі кілемге қобалжып шықтым, салдарынан жеңіліп қалдым, — дейді Айдарбек Бұланов.

Қожаберген Жырау — атақты қолбасшы, шежіреші, жырау, ақын. Бұған дейін халық әні болып келген «Елім-ай» дастанының авторы.

Ұйымдастырушылардың айтуынша, бұл дода — жай ғана спорттық сайыс емес, ұлы жыраудың рухына тағзым, өнеріне көрсетілген құрмет.

Жарыс 15 наурызда аяқталады.

Бұған дейін күрес түрлерінен Азия чемпионатына баратын Қазақстан құрамасы анықталғанын жазған едік.