Петропавлда құрылысқа рұқсат құжаттарды негізсіз бермегендер жазаланды
ПЕТРОПАВЛ. KAZINFORM — Петропавлдың бірнеше тұрғыны әкімдіктен құрылысқа қажетті құжаттарды ала алмай, мәселе мемлекеттік органның араласуынан кейін шешілді.
Мемлекеттік қызмет істері агенттігінің Солтүстік Қазақстан облысы бойынша департаментінің басшысы Дархан Хайруллиннің айтуынша, тұрғындар қолданыстағы тұрғын үйлердің жекелеген бөліктерін қайта жаңғырту және қайта жоспарлау үшін сәулет-жоспарлау тапсырмасын алуға өтініш берген. Алайда Петропавл қаласы әкімдігінің құрылыс, сәулет және қала құрылысы бөлімі өтініштерді қанағаттандырудан бас тартқан. Мамандар мекенжай бойынша егжей-тегжейлі жоспарлау жобасының жоқтығына байланысты құрылыс пен реконструкциялау мүмкін емес деп шешім шығарған.
— Бұл заңсыз шешім. Қазақстан Республикасы Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің түсіндірмесіне сәйкес, қолданыстағы ғимараттар мен құрылыстардың жекелеген бөліктерін салу және реконструкциялау үшін егжей-тегжейлі жоспарлау жобасы талап етілмейді. Тексеру қорытындысы бойынша өтініш иелерінің құқықтары қалпына келтіріліп, оларға құрылыс пен реконструкция жүргізуге қажетті сәулет-жоспарлау тапсырмалары берілді, — дейді Дархан Хайруллин.
Ал мемлекеттік қызмет көрсетуден негізсіз бас тартқан жауапты лауазымды тұлғалар ҚР Әкімшілік құқық бұзушылық туралы кодексіне сәйкес әкімшілік жауапкершілікке тартылды.
Жалпы, жыл басынан бері СҚО-да осылайша сегіз адамның құқығы қорғалды. Мамандардың айтуынша, егер мемлекеттік қызметтердің сапасына қатысты сұрақтар немесе ұсыныстар туындаса, азаматтар «е-Өтініш» жүйесі немесе Telegram желісіндегі EgovKzBot2.0 сервисі арқылы жүгінуге болады.
Бұған дейін СҚО-да мемқызметшілердің еңбек құқығы бұзылып келгенін жазған едік.
