Петропавлда сотталған әйелдер үшін бейнетаксофон жүйесі іске қосылды

ПЕТРОПАВЛ. KAZINFORM - Петропавл қаласындағы №50 түзеу мекемесінде жазасын өтеуші әйелдерге бейнетаксофон жүйесі енгізілді.

Жоба Мемлекет басшысы Қасым-Жомарт Тоқаевтың осы жылдың 14 наурызында Құрылтайда берген тапсырмасын орындау аясында және «Заң мен Тәртіп» тұжырымдамасын іске асыру шеңберінде жүзеге асырылды.

Бас прокуратура мәліметінше, бастама ең алдымен, кәмелетке толмаған балалары бар аналарға жағдай жасауды көздей отырып, қамаудағы азаматшалардың тұрмыс жағдайын ізгілендіруге бағытталған.

Жаңа жүйе арқылы сотталған әйелдер жақындарымен бейнеқоңырау арқылы сөйлесе алады. Әрбіріне жеке ID-код берілген, байланыс тек жеке ісінде тіркелген телефон нөмірлеріне хабарласуға мүмкіндік береді. Туыстары Google Play арқылы «Soilephone» қосымшасын жүктеп алып, байланыс ақысын өздері төлей алады.

Бейнеқоңыраудан бөлек, аудио және бейнехабарлама, SMS алмасу қызметі қолжетімді.

Барлық ақпарат қорғалған серверде сақталады, бұл дербес мәліметтердің сенімді қорғалуын қамтамасыз етеді.

Жүйені енгізу келесідей нәтижелерге қолжеткізуге мүмкіндік береді:

- сотталғандардың күйзеліс деңгейін төмендету;

- отбасылық байланыстарды сақтау және нығайту;

- заңға бағынуға ынталандыруды арттыру;

- әйелдердің бостандыққа шыққаннан кейінгі қоғамға бейімделуіне ықпал ету.

Жоба облыс прокуратурасының, Қылмыстық-атқару жүйесі департаментінің және «Жас Тарлан» ЖШС-нің қатысуымен іске асырылып жатыр.

Айта кетейік, СҚО-да биыл 122 сотталғанның жазасы қатаңдатылды.

СҚО-да сотталғандар кәсіпкерлік негізін меңгеріп, қаржылық сауатын арттырады.