Петропавлда теректің мамығы жанып, 1,5 гектар аумақты өрт шалды
ПЕТРОПАВЛ. ҚазАқпарат – Петропавлдағы саяжайлардың бірінің қасында теректің мамығы өртеніп, 1,5 га жер жанып кетті, деп хабарлайды ҚазАқпарат тілшісі.
Солтүстік Қазақстан облысы полиция департаменті баспасөз қызметінің мәліметінше, 8 маусым күні сағат 18.05 шамасында 101 нөміріне Петропавлдағы Заречный кентінде өрт шыққандығы туралы хабарлама түседі. Есіл өзенінің бойында, «Искра» саяжайының қасында теректің мамығы тұтанып, өрт кепкен шөпке жайылған.
Оқиға орнына №2 және №3 өрт сөндіру бөлімшелерінің жеке құрамынан 10 адам және 2 техника жұмылдырылды. 1,5 га жайылған өрт тек бір сағаттан кейін ғана толық сөндірілді.
Мамандардың айтуынша, зардап шеккендер жоқ. Келген шығын мөлшері анықталатын болады.
Бұған дейін СҚО-да терек мамығынан өрттердің жиілеп кеткенін айтқан едік.
