Петропавлда жауын салдарынан тұрғын үйлерге су кірді
ПЕТРОПАВЛ. KAZINFORM – Петропавлда бүгін жаңбыр құйып, салдарынан тұрғын үйлерге су кірді. Көшелерде толарсақтан келер су тұр.
Әлеуметтік желіде пайда болған бейнежазбалардан тұрғындардың таңданысын байқауға болады. Өйткені бұған дейін жаңбыр жауғанымен, мұншалықты су қала көшелерінде тұрған емес.
Кей тұрғындар пәтерлеріне төбеден су ағып, дүние-мүлкіне зақым келгеніне шағымданып жатыр.
Петропавлдың Ойқала ықшам ауданында аққан жаңбыр суы тұрғын үйлерге кіріп кетті.
«Қазгидромет» РМК Солтүстік Қазақстан облыстық филиалының мәліметінше, облыс аумағына Солтүстік циклоны әсер етіп, атмосфералық жылы және суық фронттардың өтуінен қатты жаңбыр жауып, найзағай ойнады.
Петропавлдағы «Қызылжар» автоматты метеорологиялық станциясында сағат 12.00-де 44,1 мм жаңбыр жауған. Бұл онкүндік нормадан 1,9 есе асып, айлық нормадан 64% құрады. Бұдан бөлек кей жерлерде диаметрі 5 мм бұршақ 3 минут бойы жауған. Петропавлда әлі де жаңбыр құйып тұр.
Бұған дейін СҚО білім басқармасына жаңа басшы тағайындалғанын жазған едік.
