Петропавлдағы ЖЭО-2 нысандарына автоматтандырылған мониторинг жүйелері орнатылды
ПЕТРОПАВЛ. KAZINFORM – Жаңа жүйе Экологиялық кодекске сай орнатылды және қазір сынақ режимінде жұмыс істеп жатыр.
«Севказэнерго» АҚ баспасөз қызметінің мәліметінше, кәсіпорын автоматтандырылған мониторинг жүйелерін мердігерден ресми қабылдауды әлі толық аяқтаған жоқ.
Жабдықтар Петропавл 2-Жылу электр орталығының үш негізгі нысанына: Есіл өзеніне құятын су құбырына, №3 түтін мұржасына және жаңадан салынған түтін мұржасына орнатылды. Судың сапасы нақты уақытта бақыланады.
- Жобаның ең басты бөлігі – Есіл өзеніне ағатын су құбырына автоматтандырылған су мониторингі жүйесін орнатып, іске қосу болды.
Қазір бұл жүйе сынақ режимінде жұмыс істеп тұр және ол Белое көлінен келетін судың сапасын бақылау үшін қолданылады.
Орнатылған жабдық нақты уақыт режимінде негізгі көрсеткіштерін - су шығынын, температураны, сутегі көрсеткішін, электр өткізгіштікті, лайлану деңгейін көрсетеді, - дейді «СЕВКАЗЭНЕРГО» АҚ қоршаған ортаны қорғау басқармасының басшысы Николай Максимов.
Маманның айтуынша, әр 20 минут сайын алынған деректер өңделіп, мұрағатталады және автоматты түрде «Қоршаған ортаны қорғаудың ұлттық деректер банкі» ақпараттық жүйесіне жіберіледі. Бұл ақпарат 5 жылға дейін сақталады.
Түтін мұржаларына орнатылған жүйелер де іске қосылған. Олар арқылы кәсіпорын атмосфераға шығарылатын зиянды заттардың көлемін тәулік бойы бақылай алады. Бұл – белгіленген экологиялық талаптардың сақталуын қамтамасыз етеді.
- Бұл – экологиялық ашықтық пен жауапкершілікке бағытталған маңызды қадам. Орнатылған жүйелер белгіленген нормалардың қатаң сақталуын қамтамасыз ете отырып, ластаушы заттардың шығарындыларының көлемін тәулік бойы бақылауға мүмкіндік береді, — дейді Николай Максимов.
Бұған дейін Петропавл ЖЭО-2-нің жаңа түтін мұржасы іске қосылғанын жазған едік.
