Пиротехника сату ережелерін бұзған 829 адам жауапқа тартылды – ҚР ІІМ
АСТАНА. ҚазАқпарат – 25 желтоқсаннан 3 қаңтарға дейін арнайы жедел-профилактикалық шарада 16 мыңнан астам сертификатталмаған пиротехника алынды. Бұл туралы Ішкі істер министрлігінің өкілі Шұғыла Тұрлыбек айтты, деп хабарлайды ҚазАқпарат тілшісі.
«Бұл күндері полицейлер ТЖ қызметкерлерімен бірлесіп, пиротехникалық заттар мен бұйымдар айналымы ережелерінің сақталуын қадағалады. Мәселен, пиротехникалық өнімдерді сату ережелерін бұзғаны үшін - 829 адам, бөлінбеген жерлерде қолданғаны үшін - 11, сақтау және тасымалдау тәртібін бұзғаны үшін 2 адам жауапқа тартылды», - деді Шұғыла Тұрлыбек Ішкі істер министрлігінің апталық брифингінде.
Жаңа жыл қарсаңында отшашудан 15 адамның күйік алу фактісі тіркелді, оның ішінде кәмелетке толмаған 6 бала бар.
«Мысалы, елордада екі кәмелетке толмаған баласы бар ер адам отшашуды қолданғанда ерні мен қолын күйдіріп алған. Ал пиротехниканы дұрыс қолданбау салдарынан пәтердің балконы өртенген», - деді ресми өкіл.
Фото: Алматы қаласы ТЖД
