Полиция «хакерлік шабуыл» жасап, 350 млн теңгені ұрлаған күдіктіні ұстады

АСТАНА. KAZINFORM – Өткен жылы Жамбыл облыстық балалар ауруханасына «хакерлік шабуыл» жасалып, салдарынан оның есепшотынан 350 миллион теңге ұрланған болатын.

Бұл оқиғаға байланысты полицейлер сотқа дейінгі тергеу амалдарын жүргізді.

Жүргізілген жедел-іздестіру іс-шараларының нәтижесінде аталған қылмыстық құқық бұзушылықты жасады деген күдікпен бұрын сотталған 33 жастағы ер адам ұсталды.

- Ұрланған 305 миллион теңге аурухана шоттарына қайтарылды, - делінген Жамбыл облысы ПД хабарламасында.

Қылмыстық істің материалдары қосымша тергеу жүргізу үшін Жамбыл облысы бойынша Экономикалық тергеу департаментіне жіберілді.

ҚПК-нің 201-бабына сәйкес, тергеу мүддесіндегі өзге де мәліметтер жария етілмейді.

Еске салсақ Жамбыл облысында полиция бөлімі басшысының орынбасары ұсталғаны туралы жазған едік.