Премьер-министр: Бізге өнім бөлісу келісімдерін бұзуға болмайды

АСТАНА. KAZINFORM – Премьер-министр Олжас Бектенов Үкімет отырысынан кейін өтіп жатқан баспасөз мәслихатында Теңіз, Қашаған, Қарашығанақ мұнай жобалары бойынша инвесторлармен бекітілген өнім келісімдері мен тікелей келісімдерді қайта қарау мәселесі туралы пікір білдірді.

- Біз бұл келісімдерді бұзбаймыз. Ол елімізге зиянынан басқа ештеңе әкелмейді. Бұл – инвестициялық климатқа байланысты мәселелер. Бірақ біз қазір келіссөздерді бастадық. Алдағы уақытта жаңа келісімге қол қою керек. Осы келіссөздер шеңберінде біз міндетті түрде ұлттық мүддені қорғаймыз, - деді ол.

Олжас Бектенов бұл мәселе бойынша Қазақстан халықаралық төрелікке жүгінгенін де еске салды.

- Қазір өздеріңіз білетіндей, халықаралық төрелікке бердік. Ел мүддесін халықаралық арбитражда да қорғауға тырысамыз. Нәтижесін көреміз, - деді Олжас Бектенов.

Бұған дейін Қазақстан неге Қашаған акционерлерінен $150 миллиард талап етіп отырғанын жазған едік.