Премьер-Министр елге жанашырлық танытқан кәсіпкерлерге алғыс айтты
АСТАНА. KAZINFORM – Ұйымшылдық пен ауызбіршіліктің арқасында су тасқыны табиғи апатын аман-есен еңсере алдық. Бұл туралы елордадағы «Адал азамат. Адал еңбек. Адал бизнес» форумында Премьер-Министр Олжас Бектенов мәлім етті.
«Мемлекет басшысы биылғы Жолдауында бизнес жүргізуге қажет жағдайды жақсарту бойынша біздің алдымызға бірнеше нақты міндет қойды. Осы орайда Үкімет кәсіпкерлермен бірге елдегі іскерлік белсенділікті арттыру, бизнес бастамаларға қолайлы жағдай жасау бағытында жұмыстарды тұрақты жүргізіп келеді. Кез келген экономиканың негізгі тірегі кәсіпкерлік екені баршамызға мәлім. Сондықтан отандық кәсіпкерлермен сенімді және өзара тиімді серіктестік орнату – Үкімет үшін сөзсіз басымдық», - деді О.Бектенов.
Премьер-Министр биылғы ауқымды су тасқыны кезінде бизнес өкілдері де жұмылып, жергілікті халыққа көмек қолын созғанын еске салды.
«Ұйымшылдық пен ауызбіршіліктің арқасында табиғи апатты аман-есен еңсере алдық. Шағын және орта бизнес субъектілері де бұл апаттан қатты зардап шекті. Оларға келтірілген шығындарды өтеу жұмыстары осы жылдың сәуір айынан бастап жүріп жатыр. Бүгінгі күнге дейін 10 млрд теңгеден астам шығын өтелді», - деді ол.
Сонымен қатар Үкімет басшысы бизнес Президенттің жалпыұлттық «Таза Қазақстан» бастамасын іске асыруға да белсенді атсалысып жатқанын атап өтті.
«Бұл акция ауылдың немесе қаланың тазалығы ғана емес, ортақ мақсатқа жұмылған қоғамның бірлігінің айқын көрінісі. Сондықтан елге жанашырлық танытқан азаматтар мен кәсіпкерлердің барлығына Үкіметтің атынан шынайы ризашылығымды білдіргім келеді», - деді Олжас Бектенов.
Айта кетейік, осыған дейін Премьер-министр Олжас Бектенов тиісті министрлер мен өңір әкімдерінің қатысуымен 2025 жылғы су тасқыны кезеңіне дайындық мәселесі бойынша кеңес өткізді.
