Президент Астанада Қазақстан-Қытай жасанды интеллект мектебін ашуды ұсынды
АСТАНА. KAZINFORM — Қазақстанда жасанды интеллект саласына маман даярлау ісін мектеп қабырғасынан бастап күшейту қажет.
Мемлекет басшысы Қасым-Жомарт Тоқаев Үкіметке Қазақстан-Қытай жасанды интеллект мектебін ашу мәселесін пысықтауды тапсырды.
— Қыркүйекте Жасанды интеллект университеті ашылады. Бірақ бұл жеткіліксіз деп ойлаймын. Үкімет Қытайдың жаңа технологияларды меңгерудегі жетістігі мен тәжірибесін ескере отырып, Астанада Қазақстан-Қытай жасанды интеллект мектебін ашу мәселесін пысықтағаны жөн, — деді Қасым-Жомарт Тоқаев елордада республикалық Тамыз конференциясында.
Бұған дейін Мемлекет басшысы мектептерге ЖИ енгізу тапсырмасы тиісті деңгейде орындалмағанын сынаған еді.
Президент балалар мен педагогтердің ЖИ-ді дұрыс әрі жүйелі қолдану тәртібін белгілейтін пәрменді шараларды шұғыл қабылдауды тапсырды.
Сондай-ақ Президент әлеуметтік желіде білім беру саласына қатысты негізсіз дау-дамай мен айқай-шудың көбейгенін сынға алды.
