Президент кубогы: Заңғар Нұрланұлы челленджер турнирінде алғаш рет өнер көрсетті

АСТАНА. KAZINFORM — Елордада Президент кубогы үшін теннистен халықаралық ATP Challenger Tour турнирі өтіп жатыр.

Ұйымдастырушылардан арнайы шақырту алған 17 жастағы Заңғар Нұрланұлы челленджер жарысында алғаш рет өнер көрсетті.

Тырнақалды кездесуінде Заңғар тәжірибелі теннисші, кезінде әлемдік рейтингіде 50-орынға дейін көтерілген, қазіргі кезде 387-сатыда тұрған, турнирдің 8-ракеткасы, литвалық Ричардас Беранкиспен шеберлік байқасты.

Қазақстандық жас теннисші 2:6, 2:6 есебімен есе жібергеніне қарамастан, ересектер арасында өзінің шама-шарқын байқап көрді.

Беранкис — Литва теннисінің жарық жұлдызы, жасөспірімдер арасында 2007 жылғы US Open жеңімпазы, өз елінің тарихында ТОП-100-ге кірген жалғыз ойыншы. Ол 2014 жылы Астана Президент кубогы, 2017 жылы Шымкентте челленджер додасында топ жарды.

Тағы бір 17 жастағы қазақстандық, ATP рейтингісінде 971-сатыдағы Әмір Омарханов бүгін әлемнің 577-ракеткасы, жапониялық Имай Шинтаромен ойнайды.

Еске сала кетейік, бұдан бұрын қатарынан екі турнирде чемпион атанған Александр Бубликтің ТОП-25-ке кіргенін жазған едік.