Президент кубогына арналған бокс турнирі ЭКСПО-2017-ге арналады
«Еліміздің ұлттық құрамасының бас жаттықтырушысы Мырзағали Айтжанов АИБА академиясы базасында команданың алғашқы оқу-жаттығу жиынын қорытындылап, 2017 жылға арналған жоспарлармен бөлісті. Алда Азия және әлем чемпионаттары. Сондықтан жауапты жарыстарға барынша тыңғылықты дайындалу қажет. Сонымен қатар боксшылардың бірқатар халықаралық турнирге қатысуы да жоспарланған», - делінген федерация баспасөз қызметі таратқан ақпаратта.
Юрий Цхай жаттығу процестері сапасын арттыруға, ұзақмерзімді келешекке арналған жоспар түзуге, жаттықтырушылардың біліктілігін арттыруға баса назар аудартты. Оның айтуынша, бірнеше жылдан кейін ересектер арасында Қазақстанның намысын халықаралық аренада қорғай тын ұлттық команда резервіне айрықша назар аудару қажет.
Айта кетерлігі, Вадим Присяжнюк жаттықтыратын еліміздің қыздар құрамасы Сербияда өткен Ұлт кубогы жыл сайынғы турнирінде тамаша өнер көрсетіп, жалпыкомандалық есепте бірінші орын алды.
«Ағымдағы жылдың маусымында Қазақстан Президенті кубогына арналған ерлер мен қыздар арасындағы турнир өтеді. Ол «ЭКСПО-2017» дүниежүзілік көрмесіне арналады. Бұл турнир бокс жанкүйерлері арасында зор қызығушылық тудырады, ал спортшылар жоғары деңгейде тәжірибе жинақтайды деп күтілуде», - делінген таратылған ақпаратта.