Президент «ОА-Қытай» форматындағы смарт-инновацияларды Astana Hub арқылы ілгерілетуді ұсынды

АСТАНА. KAZINFORM — Мемлекет басшысы Қасым-Жомарт Тоқаев «Орталық Азия-Қытай» саммитінде бірлескен смарт-инновацияларды Astana Hub арқылы ілгерілетуді ұсынды.

— Күзде Астанада Alem Аi халықаралық жасанды интеллект орталығы ашылады. Оған Қазақстанның инновациялық дамуының қозғалтқышы болады деген үміт артылып отыр. Орталық Азия-Қытай байланысының аясында Astana Hub технопаркінің алаңын смарт-инновацияларды ілгерілетуге пайдалануды ұсынамыз, — деді Тоқаев.

Сондай-ақ, Президент бұл перспективалы жобаға барлық шетелдік инвесторлар қатыса алатынын атап өтті.

Айта кетейік, елордада «Орталық Азия — Қытай» ІІ саммиті өтіп жатыр. Іс-шараға Мемлекет басшысы Қасым-Жомарт Тоқаев, ҚХР төрағасы Си Цзиньпин, Өзбекстан Президенті Шавкат Мирзиёев, Қырғызстан Президенті Садыр Жапаров, Түрікменстан Президенті Сердар Бердімұхамедов және Тәжікстан Президенті Эмомали Рахмон қатысып отыр.

«Орталық Азия — Қытай» І саммиті 2023 жылдың 19 мамырында Қытайдың Сиань қаласында өткен еді.

Бұған дейін Тоқаев «Қорғас» Қытаймен сауда-экономикалық байланыстарда Орталық Азияның басты қақпасына айнала алатынын айтты.

Сонымен қоса Қазақстан Қытаймен жасанды интеллект, биотехнология, кванттық есептеу салаларында бірлескен жобаларды іске асыруға мүдделі екені айтылды.