Президент шахматшы Меруерт Камалиденованы FIDE World Cup 2025 жарысындағы жетістігімен құттықтады
АСТАНА. KAZINFORM - Президент Грузияның Батуми қаласында өтіп жатқан Әлем кубогының іріктеу сайысында белгілі шахмат шеберлерін қапы қалдырған Меруерт Камалиденоваға құттықтау жеделхатын жолдады, деп хабарлайды Ақорданың баспасөз қызметі.
– Мемлекет өзіңіз сияқты талапты жастарға әрқашан қолдау көрсетеді. Елімізде бұл интеллектуалды ойын түрін жаппай дамыту үшін нақты шаралар қолға алынды. Өскелең ұрпақ өздеріңізге қарап бой түзейді. Әрбір жеңістеріңіз оларды жігерлендіреді, – деп жазылған жеделхатта.
Мемлекет басшысы спортшыға алдағы финалдық сайыстарда сәттілік тіледі.
Айта кетейік, осыған дейін елордалық шахматшы әлем кубогында сенсация жасаған болатын.
Ол шахматтан әйелдер арасында Грузияның Батуми қаласында өткен Әлем кубогының 1/32 финалында осы уақытқа дейін чемпион болып келген Александра Горячкинаны (рейтингте 6-орын) жеңіп кетті.
