Президент Сирек кездесетін металдарды зерттейтін аймақтық орталық құруды ұсынды
САМАРҚАНД. KAZINFORM – «Орталық Азия - Еуропа Одағы» саммитінде сөз сөйлеген Президент Қасым-Жомарт Тоқаев АстанадаСирек кездесетін металдарды зерттейтін аймақтық орталық құруды ұсынды, деп хабарлайды Kazinform агенттігінің меншікті тілшісі Әлихан Асқар.
- Сирек кездесетін металдар саласындағы ынтымақтастық болашақ іс-қимылдардың маңызды бағыты саналады. Қазақстан Еуроодақтың экономикасына қажетті 34 шикізаттың 19-ын шығарады. Оның ішінде, уран, титан және вольфрам бар. Біз Еуропалық қайта құру және даму банкімен келісім аясында гелологиялық барлау жүргізуге, тау-кен өндірісі саласына озық тәжірибелерді енгізуге мүдделіміз. Толық әлеуетті пайдалану үшін Астанада Сирек кездесетін металдарды зерттейтін аймақтық орталық құруды ұсынамын, - деді Президент.
Мемлекет басшының айтуынша, құрылуы ықтимал орталықта игеруге қолайлы кен орындары туралы ақпараттар сақталады. Тиісініше, бұл шетелдік инвесторлар үшін тиімді платформа болмақ.
Айта кетейік, Өзбекстанның Самарқанд қаласында «Орталық Азия - Еуропа Одағы» форматындағы алғашқы саммит басталды.
Бұған дейін Мемлекет басшысы Қасым-Жомарт Тоқаев «Орталық Азия – Еуропа Одағы» саммитіне қатысу үшін «Конгресс-орталыққа» келгенін жазып едік.
Бұрын хабарлағанымыздай, кеше Президент Қасым-Жомарт Тоқаев Өзбекстанға жұмыс сапарымен келді. Оның барысында Мемлекет басшысы Еуропалық кеңес президенті Антониу Кошта, Еуропалық комиссия президенті Урсула фон дер Ляйен, Еуропалық қайта құру және даму банкінің президенті Одиль Рено-Бассомен екіжақты кездесулер өткізді.
