Президент судьялардың жаңа әдеп кодексін қабылдауды қолдады
АСТАНA. KAZINFORM – Бүгін Қазақстан судьяларының съезінде ҚР Президенті Қасым-Жомарт Тоқаев Судья әдебінің жаңа кодексін қабылдауға қатысты пікір айтты.
Мемлекет басшысының айтуынша, судьялар адалдықтың, дербестік пен әділдіктің жарқын үлгісі болуы керек. Судьялардың барлық өрескел заң бұзу әрекеттерін сот жюриі тексереді. Бұл тәсіл қазақстандық судьялардың тәртіптік жауапкершілігін арттырады.
Президент судьялар арасында сот билігінің беделіне нұқсан келтіретін этика нормаларын бұзу фактілері бар екенін атап өтті. Кей жағдайда сот қауымдастығы оларға дер кезінде әрекет етпей жатады.
«Мұндай жағдайға жол бермеу керек. Сондықтан бүгінгі съезде Судьялардың жаңа Әдеп кодексінің қабылдануын қолдаймын. Бұл құжат судьялар арасында жоғары стандарттарды орнатуға және қоғамның сот жүйесіне деген сенімін нығайтуға мүмкіндік беретініне сенімдімін», - деді Қасым-Жомарт Тоқаев.
Сонымен қатар Мемлекет басшысы Жолдауда елімізді дамыту жолындағы нақты міндеттерді айқындағанын атап өтті.
«Заң және тәртіп идеологиясын орнықтыру мәселесіне ерекше тоқталдым. Сот органдары осы маңызды жұмысқа белсене атсалысуы керек. Мен қазылар қауымына үлкен үміт артамын. Сіздер Әділетті Қазақстанды құруға зор үлес қосасыздар деп сенемін», - деді Мемлекет басшысы.
