Президент тапсырмаларының орындалуы: Министрліктер баяндама жасады

АСТАНА. KAZINFORM — Мемлекеттік кеңесші Ерлан Қарин Президенттің IV Ұлттық құрылтай отырысында берген тапсырмаларын жүзеге асыру бойынша жиын өткізді, деп хабарлайды Ақорданың баспасөз қызметі.

Басқосуда жауапты министрліктер басшылары мен Президент Әкімшілігінің бөлім меңгерушілері баяндама жасады.

Бурабайдағы Ұлттық құрылтайда көтерілген бастамалар бойынша заң жобаларын, «Қазақстан балалары» бағдарламасын, ішкі саясат саласындағы концептуалдық құжатты әзірлеу, сондай-ақ өңірлерде инфрақұрылымдық жобаларды іске асыру мәселелеріне айрықша мән берілді.

Мемлекет басшысы Қасым-Жомарт Тоқаевтың Ұлттық құрылтай аясындағы тапсырмаларының орындалуы Президент Әкімшілігінің бақылауында болады. Олардың жүзеге асырылу барысы бойынша жиналыс тұрақты түрде өткізіледі.

Бұған дейін Ерлан Қарин ауыл әкімдерінің корпусы 100 пайыз жаңартылғанын айтқан еді.