Президент тапсырмасы: Қымбат әуе билеттеріне қатысты 2 компания тексерілуде
НҰР-СҰЛТАН. ҚазАқпарат - «Эйр Астана» мен «Scat» әуе компанияларының монополияға қарсы заңнаманы сақтауын тергеп-тексеру басталды. Бұл туралы ҚазАқпарат ҚР Ұлттық экономика министрлігіне сілтеме жасап хабарлайды.
«Азаматтық авиация қызметтері нарығында баға белгілеу тәжірибесін зерделеу мақсатында Ұлттық экономика министрлігі «Эйр Астана» АҚ және «SCAT әуе компаниясы» АҚ-қа қатысты Қазақстан Республикасы Кәсіпкерлік кодексінің 174-бабының 1-тармақшасында көзделген бұзушылық белгілері, авиабилеттерге монополиялық жоғары баға белгілеу бөлігінде үстем немесе монополиялық жағдайды теріс пайдалану бойынша тергеп-тексеру жүргізуге бастамашылық етті», - делінген министрлік ақпаратында.
Ведомство мәліметінше, тергеп-тексеру жүргізуге Қазақстан Республикасы Индустрия және инфрақұрылымдық даму министрлігі Азаматтық авиация комитетінің шағымы негіз болған.
Тергеп-тексеру нәтижелері бойынша әуе билеттеріне қолданылатын бағалардың негізділігі бағаланады.
Еске сала кетсек, Қазақстан халқына Жолдауында Президент Қасым-Жомарт Тоқаев Қазақстанда ұшақ билетінің қымбат болуына қатысты сын айтқан болатын. Сондай-ақ, сол кездегі ҚР Индустрия және инфрақұрылымдық даму министрі Роман Скляр Президенттің «ұшақ билеті қымбат» деген сынына қатысты мәселе реттелетініне уәде берген еді.