Президент жанындағы Ұлттық қорды басқару кеңесінің міндеттері кеңейтіледі

АСТАНА. KAZINFORM — «Ұлттық экономика министрлігі Ұлттық қорды басқару жөніндегі кеңестің кейбір мәселелері туралы» Президент Жарлығының жобасын көпшілік талқылауына шығарды.

Жаңа редакция бойынша Ұлттық қор қаражатын облигациялық қарыздар нысанында пайдалану жөніндегі мәселелер қаралған жағдайда ұсыныстар әзірлеу тек жалпыхалықтық маңызы бар жобаларды сараптау нәтижелері негізінде ғана жүзеге асырылады.

Сондай-ақ, кеңестің міндеттеріне жаңа екі тармақ қосылып отыр. Олар:

• Қазақстан Республикасының Ұлттық қорынан республикалық бюджетке кепілдендірілген трансферттің мөлшерін айқындау жөнінде ұсыныстар әзірлеу.
• Қаржыландырудың баламалы көздері болмаған кезде аса маңызды объектілер мен жалпыхалықтық маңызы бар жобаларды айқындау жөнінде ұсыныстар әзірлеу.

Құжат Президенттің 11 Жарлығының күшін жоюды да көздейді.

Бұл өзгерістер Бюджет кодексі 5-бабы 16-тармағының талаптарынан туындап отырғанын айту керек. 

Ал Ұлттық қорды басқару жөніндегі Президент жанындағы консультативтік-кеңесші органның құрамы өзгеріссіз қалмақ. Олар:

• Қазақстан Республикасының Президенті — Кеңес төрағасы
• Сенат төрағасы (келісім бойынша)
• Мәжіліс төрағасы (келісім бойынша)
• Президенті Әкімшілігінің басшысы
• Ұлттық банк төрағасы
• Жоғары аудиторлық палата төрағасы
• Қаржы министрі
• Ұлттық экономика министрі.

Бұған дейін Ұлттық қордан бөлінген қаражаттың жұмсалуын мониторингтеу жөніндегі комиссия жұмысын қайта бастағаны хабарланған еді.