Президент жанындағы Жасанды интеллект жөнінде кеңестің құрамында кімдер болады
АЛМАТЫ. KAZINFORM — Алматыда өтіп жатқан жасанды интеллект жайында AlmatyFair.ai көрмесіне Цифрлық даму, инновациялар және аэроғарыш өнеркәсібі министрі Жаслан Мәдиев қатысты.
Ведомство басшысы іс-шара барысында Жасанды интеллект жөнінде кеңестің құрамына кіретін сарапшыларды атап өтті.
— Президент жанындағы жасанды интеллект жөніндегі кеңес қазір белсенді түрде құрылып жатыр. Тиісті нормативтік құжаттар әзірленіп, Президент Әкімшілігімен келісу жүргізіп жатырмыз, сондай-ақ осы кеңестің құрамына қосылатын сарапшылар қоғамы іріктеліп жатыр, — деді ол.
Сондай-ақ Жаслан Мәдиев ЖИ жөніндегі кеңеске қосылуға келісім берген халықаралық сарапшыларды атады. Олардың қатарында жасанды интеллект саласындағы әлемдегі жетекші мамандардың бірі Ли Кайфу, бұрын Google-да зерттеу тобын басқарған Питер Норвиг, Жапониядағы ЖИ саласындағы танымал сарапшы Джеити «Джой» Ито бар.
Еске салайық, бұған дейін Мемлекет басшысы цифрландыру мен жасанды интеллектіні барлық салаға енгізу керек екенін айтқан еді.
