«Прогресс МС-30» ғарыш кемесі бар зымыран Байқоңырдан сәтті ұшырылды
АСТАНА. KAZINFORM – Байқоңыр қыстың соңғы күнін ғарышқа сәтті ұшырумен қарсы алды.
Астана уақытымен сағат 2:24-те «Прогресс МС-30» ғарыш жүк кемесі «Байқоңыр» ғарыш айлағындағы 31-ші алаңнан ХҒС-қа аттанды.
«Прогресс МС-30» көліктік жүк кемесі бар «Союз 2.1а» зымыран тасығышын ұшыру белгіленген уақытта өтті және жоспарланғандай өтті. Байқоңыр ғарыш айлағынан тікелей эфир ұшырылымға жарты сағат қалғанда басталды.
Зымыран тасығыштың бүйірлік бөліктерін бөлу ұшыру циклінің схемасына сәйкес жүргізілді, жүк кемесі орбитаға тоғызыншы минутта шықты. Ғарыштық жүк көлігінің ұшуы екі күндік қозғалыс кестесіне сәйкес болады, Халықаралық ғарыш станциясымен түйісуі 2025 жылдың 2 наурызында болады. «Прогресс» станцияға 2,5 тоннадан астам жүк жеткізеді.
Белгілі болғандай, ғарыш айлағында ҚР Цифрлық даму, инновациялар және аэроғарыш өнеркәсібі министрі Жаслан Мәдиев пен Роскосмостың жаңа басшысы Дмитрий Бакановтың кездесуі өтті.
Кездесудің басты тақырыбы – «Бәйтерек» бірлескен жобасының барысы. Ағымдағы мәселені талқылау тек дөңгелек үстелде ғана емес, тікелей болашақ старты орны – «Зенит» зымыран тасығышының техникалық кешенінде де өтті.
Тараптар мамандарының хабарлауынша, қазіргі уақытта технологиялық жабдықтарды шығару бойынша жұмыстар жалғасып жатыр. Техникалық және старттық кешендер үшін үлгілер мен бұйымдарды зауыттық сынақтан өткізу жұмыстары жүргізілу үстінде. «Союз-5» зымыран тасығышының құрамдас бөліктерін сынау жұмыстары жүргізіліп, жерүсті инфрақұрылымды жаңғырту бойынша құрылыс-монтаждау жұмыстары басталды.
Бұған дейін хабарланғандай, «Бәйтерек» ғарыш кешенінде ұшыру сынақтарының мерзімі өзгерді.
Сондай-ақ Қазақстан мен Ресей делегациялары Байқоңырдың алдағы мерейтойын талқылады. Бұған дейін 70 жыл бұрын Байқоңырдың орнында не болғанын жазған едік.
Байқоңырда туып-өскен Дмитрий Баканов үшін бұл қызметке бір ай бұрын тағайындалған Роскосмостың жаңа басшысы ретінде Байқоңырға алғашқы жұмыс сапары болды
Ол өзінің сұхбаттарының бірінде космонавтиканы дамытуға атсалысу ол үшін үлкен мәртебе және жауапкершілік екенін атап өтті.
- Ғарыш деген мен үшін жай сөз емес – бұл менің тағдырым. Үмітті ақтау үшін бар күшімді саламын, - деді ол.
