Прокурорлар соттағы сөзін дайындау үшін жасанды интеллект технологиясын қолданбақшы
АСТАНА. KAZINFORM – Бас прокуратура 2024 жылдың бірінші жарты жылдығында атқарылған жұмыстарға қорытынды жасады. Прокуратура органдарының заңдылықты сақтау, құқық тәртібін қамтамасыз ету және қылмыстылықпен күрес бойынша қадағалау қызметінің нәтижелері белгілі болды. Бұл туралы Қазақстан Республикасының Бас прокуроры Берік Асылов «Егемен Қазақстан» газетіне берген сұқбатында айтты.
«Біздің жұмысымызда басымдық берілетін бағыттардың бірі — Бас прокуратураның Құқықтық статистика және арнайы есепке алу жөнiндегi комитетiнің әлеуетін арттыру. Аталған комитет жаңа цифрлы және инновация технологияларды енгізу, жасанды интеллектті қолдану бойынша үлкен жұмыстар жасап жатыр. Прокурордың соттағы сөзін дайындау үшін жасанды интеллект технологиясын қолданатын инновациялық модуль әзірленді», — деді Бас прокуроры Берік Асылов.
Оның айтуынша, қылмыстық және әкімшілік сот өндірістері, тексерулер тағайындау, азаматтардың өтініштеріне қарау цифрланды. Әкімшілік құқық бұзушылықтардың бірыңғай тізілімі, Тексеру субъектілері мен объектілерінің бірыңғай тізілімі, «Талдау орталығы», «Құқық қорғау, арнайы және басқа да органдардың ақпарат алмасу жүйесі» және «Қадағалау» БАТЖ жасалып, жұмыс атқарылып жатыр.
Бұған дейін Үкімет 5 жылдық Жасанды интеллектті дамыту тұжырымдамасын қабылдағанын жазған болатынбыз.
