«Протон-М» ЗТ құлағаннан кейін ұңғымада гептилмен ластану белгілері анықталды

АСТАНА. 10 шілде. ҚазАқпарат - «Протон-М» зымыран-тасымалдағышы құлағаннан кейін пайда болған шұңқырда гептилмен ластану белгілері анықталды. Бұл туралы бүгін «Байқоңыр» кешені бойынша Үкіметаралық ресейлік-қазақстандық комиссия жанынан құрылған жұмыс комиссиясы отырысы барысында ҚР Ұлттық ғарыш агенттігі төрағасының орынбасары Еркін Шаймағамбетов айтты.

«Қазақстандық сарапшылар ұңғыманың ортасында гептилмен ластануды растап отыр. Біздің мәліметтер бойынша, пайда болған шұңқырдың ортасында ұйғарымды концентрациясының шекті деңгейінен 527 есеге артық, оның шығыс жиегінде - қоршау нүктесінен 10 метр жерде шекті дейгей 395 есеге асып отыр, ал 10-нан 20 сантиметрге дейінгі тереңдікте гептилдің құрамы ұйғарымды концентрациясының шекті деңгейінен 3039-ды құрады»,-деп нақтылап өтті Е. Шаймағамбетов.

Оның сөзіне қарағанда, «Протон-М» құлаған орында жанып кеткен жердің ауданы 4,9 гектарды қамтыды.