Путин мен Трамптың сөйлесуі екі жақтың бастамасымен өтеді — Песков

АСТАНА.KAZINFORM — Ресей президентінің баспасөз хатшысы екі ел басшылары әңгімесінің қорытындысы баспасөзге хабарланатынын айтты, деп жазады ТАСС.

Владимир Путин мен Дональд Трамптың алдағы әңгімесі екі жақтың да бастамасымен өтеді. Бұл туралы ТАСС агенттігінің сауалына жауап берген Ресей президентінің баспасөз хатшысы Дмитрий Песков хабарлады.

— Бұл өзара келісім, — деді Кремль өкілі.

Песков екі ел басшылары әңгімесінің нәтижесі туралы баспасөзге хабарланатынын атап өтті.

— Біз қалай болатынын әлі шешкен жоқпыз, бірақ міндетті түрде хабар таратамыз, — деп сендірді ол.

Песков бұған дейін Путин мен Трамптың сөйлесуі 18 наурызға жоспарланғанын айтқан болатын. Ол әңгімелесу қанша қажет болса, сонша уақытқа созылатынын айтты. Трамп журналистерге Украинадағы қақтығыс аясында аумақтық және инфрақұрылымдық мәселелерге ерекше назар аударуға ниетті екенін білдірді.