Путин Украинаға алдын ала шартсыз келіссөздерді қайта бастау жөнінде ұсыныс жасады

АСТАНА. KAZINFORM — Келіссөз 15 мамырда Ыстамбұлда өтуі мүмкін, деп мәлімдеді президент Кремльде сөйлеген сөзінде. Бұл туралы BBC агенттігі хабарлады.

Оның сөз сөйлеуі шамамен 20 минутқа созылып, Мәскеу уақыты бойынша түнгі 1:30-да басталды.

— Келіссөздер барысында жаңа бітімге қол жеткізуіміз мүмкін, — деді Путин, әрі «енді доп Украинаның алаңында» екенін қосты.

Сондай-ақ Путин Мәскеу Батыс елдері мен Киев ұсынған жаңа бітімге келіспейтінін аңғартты.

Бұған дейін, 10 мамыр сенбі күні АҚШ, Германия, Ұлыбритания, Франция, Польша және Украина басшылары Мәскеуге 12 мамырдан бастап 30 күндік бітім жариялауды ұсынған еді.

Бұл ұсыныс Мәскеу бұған дейін біржақты түрде жариялаған үш күндік бітімгершіліктің жалғасы болар еді.

Киев әзірге Ресей президентінің ұсынысына қатысты пікір білдірген жоқ.