02:36, 28 Шілде 2013 | GMT +5
Рамазан айында қарияларға құрмет көрсетілді
ОРАЛ. 28 шілде. ҚазАқпарат - Мұхаммед Гариф Тулбаев атындағы Орал қалалық мешітінің бас имамы Қажымұқан Ғилманов облыс орталығындағы қарттар үйіне барып, ондағы жандарды Рамазан айымен құттықтады.
Облыстық мешіттің баспасөз хатшысы Нұрлан Саматұлының хабарлағанындай, имам ата-баба аруағына арнап Құран оқып, дұға қылды. «Қазақстан мұсылмандары діни басқармасының төрағасы, бас мүфти Ержан Малғажыұлының атынан баршаңызды исі мұсылманның ұлық мерекесі -Рамазан айымен құттықтаймын. Тұтқан оразамыз қабыл болсын», деген Қ.Ғилманов қарттар үйінің жанынан саябақ салынуы үшін мешіт қорынан 50 000 теңге бөлініп отырғанын жеткізді. Содан соң қариялар үйіндегі Ұлы Отан соғысының ардагері Федор Толстовтың 99 жасқа толуымен құттықтап, тілегін айтып, сыйлық табыстады.
Өз кезегінде сөз алған қариялар қасиетті Рамазан айында арнайы келіп, ыстық ілтипат білдіргені үшін имамға алғыстарын білдірді.