Рамазан айында Шахтинск қаласында 26 отбасы жаңа баспанаға ие болды

АСТАНА. ҚазАқпарат - Қасиетті Рамазан айында және Астана күнін мерекелеу қарсаңында Қарағанды облысының Шахтинск қаласында 26 отбасы жаңа баспанаға ие болды. Ұзақ жылдардан бері кезекте тұрғандарға қала әкімі Сержан Аймақов пен қалалық мәслихаттың хатшысы Жамала Мамерханова пәтерлердің кілтін табыстады. Бұл туралы «Егемен Қазақстан» басылымы жазады.

Естеріңізде болса, Елбасымыз Н.Назарбаев Қазақстан халқына жолдаған «Нұрлы Жол» бағ­дарламасында қолжетімді тұр­ғын үй құрылысын қайта қарастыруды және қазақ­с­тан­дықтарды қолжетімді, арзан баспанамен қамтамасыз етуді тапсырған болатын. Мемлекет басшысының бұл тапсырмасы біздің қаламызда да жүзеге асырылуда. Ата-анасының қам­қорлығынсыз қалған балалар, мүгедектер, көп балалы отбасылар, ардагерлер және бюджет мекемелерінің қызметкерлері қала басшысының табыстаған пәтер кілтін қуаныш­пен қолға алып, қоныс тойын тойлауға асықты.

Осы күні салтанатты ша­ра­ға жаңа пәтерге ие бол­ғандардың жақын-жуықтары, дос-жарандары да қатысып, қуаныштарына ортақ болды. Қала әкімдігінің ғимараты  тұр­­ғындарға толды. Тұла бойын билеген шаттық сезімдерімен бөліскен тұрғындар жаңа баспаналарын көруге асықты. Тіпті, кейбір отбасылар жаңа пә­­­тер­лерін жарқыраған жиһаз­дармен тол­тыруды ойластырып қойып­ты.

Қоныс тойын тойлағалы отыр­ған жаңа пәтер иелеріне «Сіз­дер осы күнді ұзақ  күт­тіңіздер. Елбасының тапсырмасына сәйкес, Қазақстан Рес­публикасының Үкіметі өңірлерді дамытудың 2020 жылға дейінгі бағдарламасын әзірлеп, тұр­ғын үйге мұқтаждарды бас­па­намен қамтуға көңіл бөлінді. Қасиетті Рамазан айында бүгін Елбасының қолдауымен жаңа баспанаға ие болып отырсыздар. Жаңа үйлеріңіз сәбилердің күлкісіне толсын, береке-бірлік арылмасын», - деді қала басшысы Сержан Жаңабекұлы.

Біз жаңа пәтерге ие болған­дардың кейбірін әңгімеге тарттық.

Надежда Аюханова, Ұлы Отан соғысының ардагері:

- Көп жылдан бері жекежайда тұрып келдім.Тозығы жеткен баспанамнан жаңа үйге көшетініме қуаныштымын. Елі­міздің көш­­басшысы, хал­қымыздың қамқоршысы Нұрсұлтан Әбішұлы Назарбаев­қа шексіз алғысымды айтамын. Алланың нұры жаусын.

Назым Барлыбай, жас отбасы мүшесі:

- Қаламыздың 30-шы ора­мындағы қызғылт сары түсті дер­бес тұрған көп қабатты тұр­ғын үйден маған да пәтер берілгендігіне бақыттан басым айналып тұр. Жаңа пәтерге ие болсам ғой, балаларым үйімізде асыр салып ойнаса екен деп көп армандушы едім. Рамазан айында Алла тағала тілегімді қабыл етті. Елбасымыз отбасымның қан­шалықты риза екенін білсе ғой.

Роза Қапар, көп балалы ана:

- Балаларым бүгін бақытты. Осы күнді аңсап, асыға күткен болатын. Мемлекет басшысына аналық ақ тілегімді жаудырамын. Еліміз тыныш, мерекелі болсын, баспанаға мұқтаж өзге де жанұялар жаңа үйге қол жеткізіп, қоныс тойын тойласын.

Сондай-ақ, басылымның бұл санында «Несие мақұлданды» атты мақала жарық көрген.

Кәсіпкерлер палатасында шағын несие­леудің жаңа бағдарламасына қатысуға өтінім берген кәсіпкерлердің жобалары қа­ралды. Олар Ақсу, Балқаш, Кербұлақ аудандарының кәсіпкерлерінен түскен 7 өтінім. Несие комитетінің шешімі бойынша барлық өтінімдер бірауыздан мақұлданды. Еске салалық, шағын бизнес субъектілері үшін 600 млн. теңгені «Атамекен» ҰКП және Алматы облысы әкімдігі бөлді.

«Қант қызылшасын өсіру жайлы төрт жоба, мал шаруашылығы бойынша екі  және жалпы сомасы 34 млн. 300 мың теңге арпа өсіру жөніндегі бір өтінім мақұлданды. Қарыз алушылар - шаруа қожалығы өкілдері және жеке кәсіпкерлер екендігін баса айту керек»,- дейді Алматы облыстық Кәсіпкерлері палатасының директоры Ләззат Шыңғысбаева.

Қазіргі уақытта ауыл шаруашылығын қаржылық қолдау қорына шешімдер хаттамалары берілді. Оларды қараған соң қаржы ұйымы қарыз алушылармен қарыз алу және ақша  құралдарын одан әрі аударуға арналған кепіл шартын жасайды. Сонымен қатар, шағын несиелеу бағдарламасы бойынша қор 62 өтінім жөнінде қаржы-экономикалық талдау, заңгерлік сараптама жүргізеді. Жағымды шешім шыққан жағдайда жобаларды Несие комитетінің  мүшелері қарайды.

Атап өтелік, комитеттің алғашқы мәжі­лісін­де жалпы сомасы 75 млн. теңгеден астам 20 өтінім қаралды және мақұлданды. Бұл жобалардың барлығы өңірдің қызылша саласын дамытуға бағытталған. Шағын несиелеу бағдарламасының басты ерекшелігі - жер учаскелерін, тұрғын үй құрылыстарын және басқадай мүлікті кепіл ретінде қарау. Сондай-ақ, сыйақы мөлшерлемесі жылдық  6%-ды  құрайды,  сыйақының жылдық тиімді мөлшерлемесі 6,7%-дан аспайды.

Одан бөлек, газеттің осы санында «Келешекке кемел қадам» атты мақала басылды.

«Елбасымыз «Қазақстан жаңа жаһандық нақты ахуалда: өсім, реформалар, даму» атты Жолдауында: «Біз - азаттық туын желбіретіп, Тәуелсіз мемлекет атанғанымыздың 25 жылдығына аяқ басамыз. Бұл - Тәуелсіздікті нығайту жолындағы өлшеусіз еңбегіміздің ширек ғасырлық белесін қорытындылайтын мерейлі сәт», - деп атап көрсетті. Алдымызда дамыған озық 30 елдің қатарына кірумен бірге «Мәңгілік Ел» идеясын іске асыру секілді толағай міндеттер тұр. Өткенге ой жүгіртсем, Тәуелсіздік алғаннан бергі кезеңде не атқар­дым, елімнің өркендеуіне қан­дай үлес қостым, деген сауал кес-кестейді. Иә, егемендіктің елең-алаң шағында күрмеуі көп көптеген экономикалық қиын­дықтарға кезіккеніміз рас. Оның бәрі кешегідей көз алдымызда. Мемлекет басшысының тура жолдан адастырмай, алға же­те­леуінің арқасында ширек ғасырлық ме­рейтойға да жетіп отыр­ғанымызға шүкіршілік дейміз» делінген мақалада.

Сол кездері құрылған «Ба­­­­бық-Бұрлық» ЖШС-і бү­гінде облыстағы ірі астық ша­руашылықтарының бірі. Біз де тәй-тәйләп өскен сәби құсап өсу, толысу, тәжірибе жинақтау кезеңдерін бастан кешірдік. Алғашқы қадамымызды кеңестік дәуірден қалған ескі «Нива», «Енисей» комбайндарымен, «ДТ-75», «Т-4», «Т-40», «ЮМЗ-6» тракторларымен бастадық. Қазір «ҚазЭкспортАстық» холдингінің құрамында жұмыс істеп жатқан­дықтан қолдау көрсетіледі.

Серіктестіктің иелігінде 25 мың гектар егістік пен жа­йылым бар. Жыл сайын дән­ді және майлы дақылдар, бір­жыл­дық және көпжылдық мал азықтарын өсіріп, мол өнім алып келеміз. Астықтың гектар берекелігін 30 центнерге дейін жеткізген тұстарымыз болды. Шаруашылықта өндіріс көлемін арттыру мақсатымен техникалық қайта жарақтандыруға, қор үнем­деу технологиясын енгізуге, ми­нералды тыңайтқыштарды және өсімдік қорғау заттарын тиімді пайдалануға айрықша көңіл бөлінеді. Біздің мамандарымыз АҚШ, Канада, Герма­ния секілді өркениетті елдерге ба­­рып, өндірістік тәжірибеден өтті. Сөйтіп, астық өндірісінің нөлдік технологиясымен жұмыс істеу тәжірибесін үйреніп келді. Соңғы жылдары сыйымдылығы 13500 тоннаға жетеғабыл 9 ас­тық сақтайтын қондырғы іске қосылды. Серіктестіктің ғимараты мен машина-трактор паркін, нау­байхана мен ауылдық клубты жы­лыту үшін заманауи қазандық орнатылды.

Кейінгі уақытта мал шаруа­­­­­шылығын дамыту бағдар­ла­­­масына белсене атсалысып ке­леміз. Компанияның қаржылық қолдауымен қазақтың етті ақбас сиырлары сатып алынды. Тұқым шаруашылығы мәртебесін ие­леніп, мал басы екі мыңға жет­ті. Канададан 10 герефорд асыл­тұқымды аталық мал әкелінді. Мал сою және қолдан ұрық­тан­дыру қосындары жұмыс істейді.

Серіктестік же­ке­мен­шік-мемлекет әріп­тестігі аясында шаруашылық аумағындағы мек­тептерге жыл сайын жөн­деу жұмыстарын жүргізіп, оқу­­шыларды тегін тамақпен қамтамасыз етеді. Төменгі Бұр­лық ауылындағы дәрігерлік амбулатория қалпына келтірілді. Агроқұрылымның күшімен балабақша, Мәдениет үйі қалпына келтірілді. Жақсы Жалғызтау ауылында қоғамдық монша іске қосылды. Жастар үшін дәмханасы бар жазғы би алаңы ашылды. Жаңа стадион, «Арлан» жабық мұз айдыны, ауыл тұрғындары демалатын «Конституция алаңы» пайдалануға берілді.

Қат-қабат тіршіліктің жете­гінде жүрсек те, ауыл­дық­тар­дың әлеуметтік мәселелерін на­зардан тыс қалдырмаймыз. Жылыжайларда көкөністер өсіріліп, тұрғындар мен бала­бақшаға, мектепке қолжетімді бағамен босатылады. Бір сөз­бен айтқанда, ел игілігі үшін атқарылып жатқан азды-көпті жетістіктерге бостандықтың ақ таңының арқасында қол жет­кізгенімізді зор бақыт санаймыз. Келешекке кемел қадаммен баса отырып, ел ризығын еселей түсуге барлық күш-жігерімізді жұмылдыратын боламыз.

Сондай-ақ, «Қазығұртта лимон өсіріле бастады» деген хабар мақаласы да осы санда жарық көрген.

«Күні кешеге дейін шетелден тасымал­данып келген лимон Оңтүс­тік жұрты үшін таңсық болудан қалды. Сарыағаш, Сайрам диқандары өсіріп келген цитрусті жеміс бүгінде таулы аудан саналатын Қазығұртта да жерсіне бастады» деп жазылған мақалада.

Қазығұрт ауданы, Қақпақ ауылының тұрғыны Оспанәлі Тақсықбаев жылыжайға отыр­ғызған 640 түп лимон ағашының әрқайсысынан 17-18 кило аралы­ғында жеміс жинап алды.

Аса мықты дәрумендер қата­рына жатқызылатын лимон­ның бағасы да көңілдегідей. Диқан жинап алған он бір тонна лимоннан түскен табыс оны қанаттандырып, жылыжай көлемін тағы да арт­тыруға бел байлатып отыр.

Сарыағаштағы тәжік орта мек­тебінің директоры еккен лимон туралы газетімізде бұрынырақта жазған едік. Әуелде қан қысымын төмендету мақсатында еккен отбасы лимонның үлкен пайда көзі екендігіне көз жеткен. Бүгінде олардың өнімін жыл сайын Ресей кәсіпкерлері көтерме бағамен алып кетеді.

Осылайша, лимон жемісі ащы болғанымен, табысы тәтті болып тұр.

«Аграрлық білімді жаңғырту арналары». Бұл тақырыппен басылған мақалада Алматыдағы Қазақ ұлттық аграрлық университетінде Қазақстан Республикасының Мемлекеттік хатшысы Гүлшара Әбдіқалықованың қатысуымен өткен ТМД-ның жетекші аграрлық жоғары оқу орындары ректорлары кеңесінің қорытынды отырысы туралы жазылған.

Кеңес жұмысына Тәуелсіз Мем­лекеттер Достастығы айма­ғы­ның 10 елінен келген 30-дан аса жоғары оқу орындарының ректорлары, Қа­зақстан Республикасы Ауыл ша­руашылығы министрлігінің және «Ұлттық аграрлық ғылыми-білім беру орталығы» коммерциялық емес акционерлік қоғамының өкілдері, Қазақстанның жетек­ші аграрлық жоғары оқу орын­дарының ректорлары, ғылыми-зерт­теу институттарының ди­ректор­лары, эксперименталдық-тәжіри­белік шаруашылықтардың және ауыл­шаруашылық өнімдерін өндіру­мен айналысатын кәсіпкер­лер қатысты.

Келелі кеңес «Аграрлық білім­нің ТМД кеңістігінде жаңғыруы» тақырыбында өтті. Атап айтқанда, жаңа аграрлық мамандықтарды ашу және бірлескен білім беру бағдарламаларын әзірлеу бойынша жұмыстарды ұйымдастыру, агроөнеркәсіптік кешенде жаңа технологияларды әзірлеу және таратудың заманауи, тиімді және бәсекеге қабілетті жүйесін құру, әлемдік білім беру кеңістігіне интеграциялану секілді бүгінгі таңда аса маңызды мәселелер  талқыланды.

Мемлекеттік хатшы өзінің кі­ріспе сөзінде Елбасы Нұрсұл­тан Назарбаевтың «Қазақ­стан-2050» Стратегиясы: қалып­тас­­қан мемлекеттің жаңа саяси бағыты» атты Жолдауында ХХІ ғасырдың жаһандық 10 сын-қатері қатарына жаһандық азық-түлік қауіпсіздігіне төнетін қатер жататындығын айтқандығын жет­кізді. Сондықтан, ұлттық қауіп­­сіздіктің құрамдас бөлігі ретін­де азық-түлік қауіпсіздігін қам­та­масыз ету Қазақстанның тәу­ел­сіз мемлекет ретінде дамуы­ның басты шарты болып табылады.

ТМД елдерінің агро­өнер­кәсіптік кешенінің инновация­лық дамуында ғылыми әзірле­мелер мен зерттеулерге үлкен мән беріледі. Бұл жерде 2003 жылы құрылған ТМД аграрлық жоғары оқу орындары ректорлары кеңесінің маңызы зор. Аталған кеңес кадрлардың кәсіби біліктілігін арттыру және оларды қайта дайындау, ТМД-ның жетекші аграрлық жоғары оқу орындары оқу-әдістемелік бірлестіктерінің өзара қарым-қатынасын және басқа да халықаралық ұйымдармен байланыс орнату арқылы жо­ғары оқу орындарының өзара ынты­мақ­тастығын ұйымдастыру аума­ғындағы жұмыстарды реттейді.

Аграрлық жоғары оқу орындарының басшылары жоғары оқу орнын ұлттық зерттеу университетіне трансформациялау, аграрлық өнеркәсіп саласында ғылым, білім және өндіріс интеграциясы механизмдерін дамыту, мемлекеттік-жекеменшік әріптестігін дамыту және тағы да басқа маңызды мәселелер тұр­ғы­сында тәжірибелерімен алмасты.

Г.Әбдіқалықова кеңес барысында ауыл шаруашылығындағы жаңа технологияларды дамыту мен алмастыру үшін нысаналы ізденіспен айналысатын университет жанынан құрылған Агротехникалық хабты басқарудың ұйымдастырушылық құрылымымен танысты. Ауыл шаруашылығы ғылымының теориясы мен тәжірибесі арасындағы байланыстырушы буын ретінде танылған мұндай хабтар бүгінгі таңда АҚШ, Аргентина, Бразилия, Израиль және Австралия елдерінде табысты жұмыс істеп тұр. Сонымен қатар, Мемлекеттік хатшы ұшқышсыз ұшатын аппараттар - дрондармен ауыл шаруашылығы алқаптарын алдын ала тексерумен айналысатын Тұрақты егін шаруашылығы орталығының ашылу салтанатына қатысты.