Референдум Президентімізді халықтың қолдайтынын тағы бір көрсетіп берді - Мәулен Әшімбаев

АСТАНА. KAZINFORM - Референдум Президентіміз Қасым-Жомарт Кемелұлы Тоқаевтың Әділетті Қазақстан қалыптастыру жолындағы бағдарын халықтың қолдайтынын тағы бір көрсетіп берді. Бұл туралы Сенат Төрағасы Мәулен Әшімбаев Фейсбуктегі парақшасында жазды. 

"Бүгін Орталық референдум комиссиясы АЭС салу мәселесіне қатысты республикалық референдумда дауыс берудің алдын ала нәтижелерін жариялады. Соған сәйкес референдумға қатысқан азаматтардың 71,12 пайызы аталған мәселені қолдап дауыс бергені белгілі болды. Осылайша, қазақстандықтар өз таңдауын жасап, ел болашағына қатысты стратегиялық шешімді демократиялық жолмен қабылдады.

Бұл оқиға Президентіміз Қасым-Жомарт Кемелұлы Тоқаевтың Әділетті Қазақстан қалыптастыру жолындағы бағдарын халықтың қолдайтынын тағы бір көрсетіп берді", - деді Сенат төрағасы.

Сондай-ақ, Сенат басшысы референдум «Халық үніне құлақ асатын мемлекет» тұжырымдамасы аясында жасалған кезекті нақты қадамдардың бірі екенін атап өтті.

"Оған (референдумға - ред.) азаматтардың белсенді қатысуы елімізде жаңа саяси мәдениеттің орныға түскенін білдіреді.

Жалпы, атом электр стансасы – тұрақты және таза қуат көзі. Бұл энергия тапшылығын азайту және экономикалық даму жолында айрықша маңызға ие. Сондықтан осы референдум және халық қабылдаған шешім елімізді жаңа белеске шығарады деп сенеміз", - деп түйді сөзін Мәулен Әшімбаев.

Айта кетейік, бұған дейін Қазақстандықтардың 71,12 пайызы референдумда АЭС құрылысын қолдап дауыс бергенін жазған едік.