Ресей мен АҚШ арасындағы Эр-Риядтағы келіссөзге кімдер қатысады
АСТАНА. KAZINFORM – Бүгін Ресей мен АҚШ делегациялары Украинадағы қақтығысты реттеу бойынша келіссөз жүргізеді, деп хабарлайды ТАСС ақпарат агенттігі.
Ресей делегациясын Федерация Кеңесінің халықаралық істер жөніндегі комитетінің төрағасы Григорий Карасин мен Федералдық қауіпсіздік қызметі директорының кеңесшісі Сергей Беседа басқарады.
Ал АҚШ делегациясының құрамында Мемлекеттік департаменттің саяси жоспарлау жөніндегі директоры Майкл Энтон, сондай-ақ Украина бойынша арнайы елші Кит Келлог пен Ұлттық қауіпсіздік жөніндегі кеңесші Майк Уолцтың көмекшілері болады деп күтіліп отыр.
Ресей президентінің көмекшісі Юрий Ушаковтың айтуынша, консультациялардың тақырыбы Қара теңіздегі астық өндіру бастамасын қайта жандандыру болмақ. Мұндай келісімдерге Ресей мен АҚШ президенттері Владимир Путин мен Дональд Трамптың телефон арқылы сөйлесуі кезінде қол жеткізілді.
АҚШ президентінің ұлттық қауіпсіздік жөніндегі кеңесшісі делегациялар Қара теңіздегі соғыс қимылдарын тоқтату мәселесіне назар аударатынын растады. Ол сондай-ақ Ресей мен АҚШ келіссөздердің келесі кезеңінде атысты тоқтату, бітімгершілік контингентін тексеру, аумақтарға иелік ету мәселелерін талқылайтынын атап өтті.
Келіссөзден бір күн бұрын АҚШ президентінің арнайы өкілі Стивен Уиткофф АҚШ Сауд Арабиясында «нақты прогреске» қол жеткізеді деп күтетінін мәлімдеді.
— Сауд Арабиясында атап айтқанда Қара теңіздегі атысты тоқтату мәселесінде нақты ілгерілеу байқалады деп ойлаймын. Осыдан кейін, әрине, толық атысты тоқтатуға қарай қозғалыс болады, - деді ол Fox News-ке берген сұхбатында.
Бұған дейін Эр-Риядта АҚШ пен Украина делегацияларының келіссөзі аяқталғанын жазған едік.
