Ресей патриархы Кирилл «Алтын Қыран» орденімен марапатталды

АСТАНА. KAZINFORM — Ресей патриархы екі ел арасындағы рухани байланыстарды нығайтуға қосқан үлесі үшін марапатқа ие болды. Бұл туралы Ақорданың баспасөз қызметі хабарлайды.

Мемлекет басшысы Әлемдік және дәстүрлі діндер көшбасшыларының VIII съезіне қатысу үшін Астанаға келген Мәскеу және бүкіл Ресей патриархы Кириллмен кездесті.

— Кездесуден кейін Қасым-Жомарт Тоқаев екі ел арасындағы рухани байланыстарды нығайтуға қосқан үлесі үшін әрі айрықша құрмет белгісі ретінде Мәскеу және бүкіл Ресей патриархы Кириллді «Алтын Қыран» орденімен марапаттады, — делінген хабарламада.

Айта кетейік, бүгін елордадағы Тәуелсіздік сарайында Президент Қасым-Жомарт Тоқаевтың қатысуымен Әлемдік және дәстүрлі діндер көшбасшылары VIII Съезінің жұмысы басталды.

Шара барысында Қасым-Жомарт Тоқаев дін басшыларын бейбітшілік елшілері деп атады.