Ресей президенті жаңартылған ядролық тежеу доктринасын бекітті
АСТАНА. KAZINFORM – Ресей Федерациясының президенті Владимир Путин ядролық тежеу саласындағы мемлекеттік саясатты бекіту туралы жарлықты бекітті.
Аталған жарлықтың негізгі мазмұны «Құқықтық актілердің ресми жарияланымында» шықты.
Жарлықта Ресей Федерациясы өзіне және Беларусь Республикасына қарсы сырттан агрессия жасалса және ол агрессия қалыпты қару қолдану арқылы жасалған күннің өзінде егемендік пен аумақтық тұтастыққа қауіп төндіретін болса, ядролық қару қолданатыны көрсетілген.
Сондай-ақ, ядролық қаруды қолдану туралы шешімді Ресей Федерациясының президенті қабылдайтыны нақтыланған. Ол бұл шешімі туралы қажет болған жағдайда өзге елдердің әскери-саяси басшылығына, халықаралық ұйымдардың басшылығына хабарлай алатыны айтылған.
Осыған дейін әлемнің 190 елінің өкілдері Ядролық қаруды таратпау туралы шартты кезекті рет пысықтағаны туралы жаздық.
