РФ Президенті Д.Медведев қазақ ғарышкерлері Т.Әубәкіров пен Т.Мұсабаевты «Ғарышты игергені үшін» медалімен марапаттайды
Бұл туралы бүгін елордада Ю.Гагариннің алғашқы ғарышқа сапарының 50 жылдығына арналған фотокөрменің ашылуы барысында Қазақстандағы РФ Елшілігінің елші-кеңесшісі Сергей Тарасенко айтты.
«Мен қазір Тоқтар Әубәкіров пен Талғат Мұсабаевтың Мәскеуде екендігін білемін. Оларды «Ғарышты игергені үшін» медалімен марапаттайды. Менің білуімше, награданы РФ Президенті Дмитрий Медведевтің өзі тапсырады», - деді ол.
Оның атап өтуінше, аталған медаль таяуда ғана бекітілген Ресейдің мемлекеттік наградасы. Бүгін ресейлік ғарыш кемесімен ұшу сапарын жасаған бірқатар шетелдік ғарышкерлерді марапаттау жоспарлануда.
Сондай-ақ оның атап өтуінше, бүгін РФ-ның еліміздегі Төтенше және Өкілетті Елшісі Михаил Бочарников Қарағандыда болып, космонавтиканың 50 жылдығына арналған мүсіндік композиция салынатын жерге нышандық іргетас қалау рәсіміне қатысты.