Риддерде жылыту маусымы басталса да ЖЭО-дағы жөндеу жұмыстары жалғасып жатыр

ӨСКЕМЕН. KAZINFORM – Шығыс Қазақстан облысындағы Риддер қаласында жылыту маусымы басталса да жылу-электр орталығындағы жөндеу жұмыстары жалғасып жатыр.

ШҚО Энергетика және тұрғын үй-коммуналдық шаруашылық басқармасының мәліметіне сүйенсек, Риддердегі жылу-электр орталығында 11 қазанға дейін 4 қазандық іске қосылады. 

«Үйлерге жылу барып тұруы үшін ЖЭО-да екі қазандық үздіксіз жұмыс істеп тұруы тиіс. Сонда бізде тағы 2 қазандық резервте болады. Ал 10 қарашаға дейін №4 және №5 екі ірі қазандықта жөндеу жұмыстары аяқталады. Барлық жөндеу жұмыстары бекітілген кестеге сәйкес жүргізіледі», - дейді басқарма басшысы Нұрлан Рамазанов.

Оның айтуынша, жылу электр орталығында көмір мен мазут қоры жеткілікті. Жаз кезінде Риддер қаласындағы 19 шақырым жылу желісіне жөндеу жұмыстары жүргізілген.

«2022-2023 жылыту маусымында Риддердегі ЖЭО-да қазандық 84 рет өшіп қалса, былтыр тек 5 рет өшкен. Бұл ретте ең бастысы – тұрғын үйлердегі температураның төмендеуіне жол бермеу. Былтырдан бері орталықта жүргізіліп жатқан күрделі жөндеу жұмыстары осы жылыту маусымын қалыпты режимде өткізуге мүмкіндік береді», - дейді Н. Рамазанов.

Еске салсақ, биыл қыркүйек айының ортасында Риддер жылу орталығында қазандықтар іске қосылып жатқанын хабарлаған едік.