Рим Папасының ауруханадан шығатын күні белгілі болды

АСТАНА. KAZINFORM - Рим Папасы Францисктің емдеуші дәрігерлері оны жексенбіде Gemelli ауруханасынан шығаратынын хабарлады, онда ол бір айдан астам уақыт емделді, деп хабарлайды ВВС.

88 жастағы понтифик екі жақты пневмониядан кейін қалпына келіп жатыр. Дәрігерлер оған енді стационарлық ем қажет емес екенін, бірақ толық қалпына келу үшін кем дегенде екі ай тыныштық қажет екенін айтты.

Естеріңізге сала кетейік, 14 ақпаннан бастап Рим Папасы денсаулығының күрт нашарлауына байланысты ауруханада жатыр. Содан бері ол өткен аптада Ватикан жариялаған бір фотосуреттен басқа көпшіліктің көзіне түспеді.

Жұма күні Кардинал Виктор Фернандес ұзақ оттегі терапиясынан кейін оның «сөйлеуді қайта үйренуі» керек екенін байқаған.

- Жағдайы әлдеқайда жақсы, бірақ оттегі көп мөлшерде болса, бәрін құрғатады. Ол қайтадан сөйлеуді үйренуі керек, бірақ оның жалпы физикалық жағдайы бұрынғыдай, - деп келтіреді Ватиканның доктриналық бөлімінің басшысы, кардинал Фернандестің сөзін Reuters агенттігі.

Сонымен қатар кардинал Фернандес понтифик өзінің алдындағы XVI Бенедикт-дан үлгі алып, тақтан бас тартуы мүмкін деген сөзді жоққа шығарды.

Бұған дейін Ватикан Рим Папасының жағдайы жақсарғанын хабарлаған еді.