Рөлге мас күйінде отырған жүргізуші - қылмыскер
АСТАНА. 11 қазан. ҚазАқпарат - Рөлге мас күйінде отырған жүргізушілерге жазаны қатаңдату қажет. Бүгін Ақордада өткен Үкіметтің кеңейтілген отырысында Мемлекет басшысы Нұрсұлтан Назарбаев осылай айтты.
«Кеше мен Қасымовпен сөйлестім. Қараңыздар, өткен жылы жолдарда 2145 адам қаза тапты. Осы жылдың 9 айында 2273 адам мерт болды», - деді ҚР Президенті.
Сонымен қатар Елбасы жол ережесін бұзушыларға қатысты заң талаптарын күшейту қажеттігін баса айта келе: «Рөлге мас күйінде отырған жүргізуші - қылмыскер. Оны бізде бар заңмен барынша қатаң жазалау керек немесе бұл заңдарды күшейту қажет», - деді.
Осы ретте ҚР Ішкі істер министрі Қ.Қасымов қазіргі заңға сәйкес жаза қатаңдатылғандығын баса айтты.
«Қауіпсіздік кеңесімен біздерге тағы не істеу керектігін ойластыр. Бұл - барып тұрған тәртіпсіздік. Адамдардан айырылудамыз. Біз мында оларды емдеп, олардың санын әрі өмір сүру ұзақтығын арттырғымыз келеді. Ал жолда олар мерт болуда»,- деді Елбасы.
