Роттердамда ер адам тұрғындарға оқ жаудырды

Нидерландтың Роттердам қаласында қаруланған ер адам 3 тұрғынды атып өлтірді. ҚазАқпарат бұл туралы BBC жаңалықтарына сілтеме жасап хабарлайды.

Қаскөй алдымен, тұрғын үйде, одан кейін жақын маңдағы «Эразмус» медициналық орталығында оқ жаудырған. Пәтерде екі адамды жаралап, артынша өртеп жіберген, деп хабарлады жергілікті БАҚ. Осыдан кейін медициналық мекемеге барып, оқ атуды жалғастырған.

Полиция күдікті ретінде Эразмус медициналық университетінің студенті болған 32 жастағы қала тұрғыны ұсталғанын мәлім етті.

Роттердам прокуроры Хюго Хилленардың айтуынша, қылмыс себептері әлі анық емес. Бірақ күдікті құқық қорғау органдарына таныс екенін, ол 2021 жылы жануарларға қатыгездік көрсеткені үшін қылмыстық жауапқа тартылып, сотталғанын айтты.

«Эразмус» медициналық мекемесіне арнайы әрекет ету жасағының қарулы полициясы барды.