Рубио мен Вальс Украинадағы атысты тоқтату туралы келіссөздер жүргізу үшін Таяу Шығысқа оралады

АСТАНА. KAZINFORM — Жиддадағы келіссөзде Америка әкімшілігінің өкілдері атысты тоқтатуға қатысты негізгі мәліметтерге тоқталады, деп хабарлайды Kazinform тілшісі.

АҚШ Мемлекеттік хатшысы Марко Рубио мен Ұлттық қауіпсіздік жөніндегі кеңесші Майк Вальц келесі аптада Ресейдің Украинаға қарсы соғысында атысты тоқтату туралы келіссөздер жүргізу үшін Сауд Арабиясына барады, деп хабарлады АҚШ президенті Дональд Трамптың арнайы өкілі Стивен Виткофф Fox News арнасына.

Трамптың Ресей президенті Владимир Путинмен телефон арқылы келіссөз жүргізгеннен кейін бірнеше сағат өткенде Виткофф бітім келіссөздері жексенбі, 23 наурызда Сауд Арабиясының Жидда қаласында жалғасатынын айтты.

Вальс пен Рубионың талқылауы атысты тоқтатуға қатысты негізгі мәліметтерге арналады. Виткофф АҚШ делегациясының кіммен кездесетінін нақтыламады, ал Украинаның келіссөзге қатысатыны белгісіз.

Қара теңіздегі энергетикалық инфрақұрылымдар мен нысандарға шабуылдардың тоқтатылуы мүмкін екендігіне түсініктеме берді.

— Менің ойымша, ресейліктер осы екі тармақ бойынша келісімді мақұлдап отыр. Украина жағы да бұл шарттарды қабылдайды деп үміттенемін, — деді Виткофф.

Ол осы сәттен бастап атысты түбегейлі тоқтатуға аз ғана уақыт қалғанын айтты. 

— Соңғы уақытқа дейін бізде бұл екі аспектіде консенсус болған жоқ — энергетика және инфрақұрылым саласындағы атысты тоқтату және Қара теңізде атқылауға мораторий — бірақ бүгін біз бұған жеттік және менің ойымша, бұл жерден толық атысты тоқтату өте жақын, — деді Виткофф эфирде.

Сәрсенбі күні Украина Ресейді АҚШ қолдаған бітімгершілік ұсынысынан іс жүзінде бас тартты деп айыптап, Мәскеу энергетикалық желіге шабуылдарды тоқтатуға келісім бергеннен кейін бірнеше сағат өткен соң азаматтық инфрақұрылымға жаппай шабуылдар туралы хабарлады.

Ал Ресей Краснодар өлкесіндегі Кавказская ауылы маңындағы мұнай базасында өткен түнде украиндық ұшқышсыз ұшақтың шабуылы салдарынан шағын өрт шыққанын хабарлады.

Еске сала кетейік, Путин мен Трамп телефон арқылы келіссөз жүргізді. 

Президенттер Украина аймағында қалыптасқан жағдай туралы пікір алмасты.

Хабарламада Путин Дональд Трамптың 30 күндік энергетикалық инфрақұрылымға шабуыл жасамау жөніндегі бастамасына қолдау білдіріп, бірден әскерге тиісті бұйрық бергені айтылды.

Қасым-Жомарт Тоқаев АҚШ пен Ресей президенттері келіссөзінің қорытындысын құптайды.