Рудныйлық бизнесменнің өлімі үшін айыпталған күдіктілерге қатысты сот үкімі шықты

ҚОСТАНАЙ. ҚазАқпарат - Қостанай облысының қылмыстық істер бойынша мамандандырылған сот үкімімен Рудный қаласының кәсіпкері Евгений Антоненконың өліміне айыпталған күдіктілерге жаза тағайындалды. Негізгі сезіктілер сотқа тартылмады, шетелге шығып кеткен олар іздеуде жүр.

Сергей Яремко 12 жылға бас бостандығынан айырылып, қатаң режімдегі түзету колониясында жазасын өтеу белгіленді. Ол 5 қылмыстық бап бойынша айыпты деп танылды.

Владимир Мацегоре Қылмыстық Кодекстің 3 бабы бойынша айыпты деп танылып, 4 жыл жалпы режімдегі түрмеде жазасын өтейтін болды. Сергей Панфилов заңсыз шекараны асып өткені және қару сақтағаны үшін 1 жылға бостандығынан айырылып, 300 АЕК (555 мың 600 теңге) көлемінде айыппұл төлемек. 4 бап бойынша оның кінәлары дәлелденбеді. Евгений Молодцов қылмыс туралы айтпағаны үшін 1 жылға шартты түрде бостандығынан айырылды. Сот сонымен бірге Қостанай облыстық ІІД бастығы мен Қостанай облысының прокурорына жеке қаулы шығарды. Онда аталған істі тергеу кезінде қылмыстық-процессуалдық заңнама нормаларының бұзылғаны туралы жазылған. Естеріңізге сала кетейік, бизнесмен Евгений Антоненко өткен жылдың соңында Рудный қаласында ұрланған. Қылмыскерлер оның өлі денесін жасырып, тасымалдаған HUMMER маркалы көлігін өртеп жіберген.