Румынияның бұрынғы президенті Ион Илиеску 95 жасында қайтыс болды

АСТАНА. KAZINFORM — Румынияның бұрынғы президенті Ион Илиеску сейсенбі күні 95 жасында өмірден озды. Бұл туралы Румыния үкіметі хабарлады, деп жазады Синьхуа.

Денсаулық сақтау органдарының мәліметінше, 2025 жылдың маусым айының басынан бері Ион Илиеску Бухаресттегі ауруханалардың бірінде емделіп жатқан. Кейін оған өкпе обыры (өкпенің қатерлі ісігі) диагнозы қойылған. Соңғы күндері оның жағдайы күрт нашарлаған.

Илиеску Румыния президенті қызметін 1990–1996 және 2000–2004 жылдар аралығында атқарған.

Румыния үкіметі Ион Илиескудің қайтыс болуына байланысты терең қайғырып, оның отбасына және жақындарына көңіл айтты.

Бұдан бұрын Нигерияның бұрынғы президенті Мұхаммаду Бухари 83 жасында Лондондағы ауруханада көз жұмғаны мәлім болды.