Рустам Азимов: ШЫҰ банкін құру ұйымның қаржылық жағдайын арттырады

БІШКЕК. ҚазАқпарат - ШЫҰ банкін құру ұйымның қаржылық жағдайын арттыратын болады. Шанхай ынтымақтастық ұйымына мүше мемлекеттер үкіметтері басшыларының кеңесі барысында Өзбекстан Премьер-Министрінің бірінші орынбасары Рустам Азимов осындай пікір білдірді, деп хабарлайды Бішкектегі «ҚазАқпарат» ХАА меншікті тілшісі.

 Оның сөзіне қарағанда, әлемдік экономикада құрылымдық әртүрлі теңгерім, қаржылық белсенділіктің төмендеуі және капиталдың азаюы орын алуда. Бірақ ШЫҰ елдерінде алға қойған міндеттерді іске асыру үшін күш-жігер мен мүмкіндіктер жеткілікті. «Біз, сауда-экономикалық байланыстарын дамыту, нарықтардағы сұранысты ынталандыру үшін бар күш-жігерімізді жұмсаймыз. Нақты қадамдар қабылданып, жаңа жобалар іздестірілуде. Ұйымның әлсіз жағы - қаржылық жағдайы. Осыған байланысты Өзбекстан ШЫҰ банкін құру бастамасын қолдайды, бірақ ол жаңа қаржылық институт болуы тиіс», - деп ескертті Рустам Азимов.

 Естеріңізге салайық, бүгін Бішкекте  ШЫҰ мүше мемлекеттер үкіметтері басшыларының Кеңесі өтуде. Қазіргі сәтте Қазақстан  ШЫҰ төрағасы болып табылады, ал 2017 жылғы  8-9 маусымда Астанада Ұйымға мүше мемлекеттер басшыларыны саммиті өтеді.