Сәкен Сейфуллин қолданған кофе ұнтақтағыш табылып, музейге қойылды
АСТАНА. KAZINFORM – Қазақтың ақыны, жазушы, драматург Сәкен Сейфуллиннің 130 жылдық мерейтойы қарсаңында ақынның өмірі мен қызметіне қатысты бірқатар тарихи құжат және жеке заттар табылып, елордаға жеткізілді. Толығырақ Сәкен Сейфуллин музейінің директоры, тарих ғылымдарының докторы, профессор Марат Әбсеметов мәлім етті.
«Биыл біздің музей Сәкен Сейфуллиннің мерейтойы қарсаңында бірқатар құнды дүниемен толықты. Соның бірі Сәкен қолданған кофе ұнтақтағыш (кофемолка), ол Қызылордадан табылып, бізге әкелінді. 1928 жылы Сәкен Сейфуллин Қызылорда халық ағарту институтын басқарған. Одан бөлек, бірқатар құжат табылды, 1922 жылы ҚазКСР-ді басқарып тұрғанда Жер кодексін қабылдаған, сол құжат бар. Ол кезде жер күн тәртібіндегі маңызды мәселелер қатарында болды. Сонымен қатар 1923 жылы 4 сәуірде авиация туралы қабылдаған құжаты біздің музейге қойылды», - деді Марат Әбсеметов Сәкен Сейфуллиннің 130 жылдық мерейтойына арналған іс-шара барысында.
Музей басшысының айтуынша, авиация туралы құжат қабылдаған соң елімізде әуе рейстері қатынай бастаған.
«Орынбор-Орал, Ақмола-Семей әуе рейстерін ашқан. Сәкен өзі ұшқыш болмаса да ұшақ бортына көтерілген алғаш қазақ. Кейін Сәкен Орынборда аэроклуб ашқан, сол клубта Талғат Бигелдинов Юрий Гагарин оқыған деп айтуға болады. Сондай-ақ, Сәкен музыкаға әуес болған, А.Затаевичтің қазақтың 1000 ән жинағын шығарып берді, Абылай хан маршын орындап берді, бір өкініштісі Затаевичтің әндер жинағына Сәкеннің қылқобызбен орындаған күйлері енбей қалған. 1964 жылы 24 тамызда Дәулет Мықтыбаев деген күйші Сәкеннің қылқобызбен тартқан «Сарыарқа», «Әупілдек» күйлерін тапсырған», - деп толықтырды тарихшы.
Одан бөлек, музей директоры биыл Түркияда (түрік тілінде) Сәкен Сейфуллиннің мерейтойына орай монография жарық көргенін айтты.
Айта кетейік, бүгін елордада Сәкен Сейфуллиннің 130 жылдық мерейтойына арналған «Ақын, ұлт қайраткері – Сәкен Сейфуллин» атты әдеби-мәдени кеш өтті. Іс-шараны Ұлттық музей мен Сәкен Сейфуллин атындағы қазақ агротехникалық зерттеу университеті бірлесіп ұйымдастырды.
Еске сала кетсек, былтыр қазанда Сәкен Сейфуллиннің бұрын-соңды жарияланбаған видеосы табылған еді.
