Салымшылардың ақшасына көліктер сатып алған: белгілі қаржы пирамидасының қызметі тоқтады

АСТАНА. KAZINFORM – Қаржылық мониторинг агенттігінің Қызылорда облысы бойынша департаменті «HRT» атауымен белгілі қаржы пирамиданың қызметін тоқтатты.

Ұйымдастырушылар азаматтарға заңды инвестициялық жоба ретінде ұсынылған схеманы жарнамалап, оған электросамокаттарды сатып алу және оларды Еуропа елдерінде жалға беру арқылы пайда табуға болады деп сендірген.

Жобаға қатысу үшін адамдардан арнайы «HRT» шотына криптовалюта аудару талап етілген.

Негізгі шарт — кем дегенде екі жаңа салымшы тарту.

— 200-ден астам азамат жобаға 50 мыңнан 35 мың АҚШ долларына дейінгі қаражаттарын салып, ай сайын 1 200 АҚШ долларына дейін сыйақы алып отырамыз деп үміттенген. Заңсыз алынған кірістің жалпы сомасы 28 млн теңгеден асты. Тергеу барысында күдіктілер салымшылардың ақшасына екі автокөлік — «BMW 530I Xdrive» және «Changan Alsvin» сатып алғаны анықталды. Аталған көліктерге сот санкциясы бойынша тыйым салынды, — делінген хабарламада.

Күдіктілерге қатысты үйқамақ ретіндегі бұлтартпау шарасы қолданылды.

— Сонымен қатар қазіргі уақытта «HRT» қаржы пирамидасының құрылымдық бөлімшелерін еліміздің жеті өңірінде — Ақтөбе, Алматы, Атырау, Жамбыл облыстарында, сондай-ақ Астана және Алматы қалаларында құру фактісі бойынша сотқа дейінгі тергеп-тексеру жүргізіліп жатыр, — делінген ҚМА хабарламасында.

ҚПК-нің 201-бабына сәйкес өзге мәліметтер жариялауға жатпайды. 

Айта кетелік Шығыс Қазақстанда 6 қаржы пирамидасы халыққа 400 млн теңгеден астам залал келтіргені туралы жазған едік.