Санитарлық дәрігерлер тексеру бастады: Көкшетауда асханадан тарақандар табылды
АСТАНА.KAZINFORM — Көкшетау қаласының тұрғыны әлеуметтік желіде облыс орталығындағы сауда орталықтарының бірінің асханасында тарақандар барын айтып шағымданған, деп хабарлайды Kazinform тілшісі.
Көкшетау тұрғыны түсірген видеодан жәндіктердің үстелдер мен азық-түлік үстінде өріп жүргенін көруге болады.
Қалалық санитарлық-эпидемиологиялық бақылау басқармасының хабарлауынша сауда үйінің асханасынан тарақан табылғаны туралы ақпаратқа сәйкес аталған нысанда жоспардан тыс тексеру жүргізіледі.
— Халықтың санитарлық-эпидемиологиялық салауаттылығы саласындағы заңнама талаптарының бұзылуы анықталған жағдайда жауапты тұлғаларға ҚР заңнамасына сәйкес әкімшілік шаралар қолданылады. Сондай-ақ анықталған заң бұзуды жою туралы ұйғарым шығарылады, — деп атап өтті департамент.
Бұған дейін Павлодарда қыз ұзату тойынан кейін 33 адам уланғанын хабарлаған едік.
