Сарапшылар: Ұлыбритания энергетикалық дағдарысқа ұшырауы мүмкін
ЛОНДОН. KAZINFORM - Британ энергетикалық дағдарыс жөніндегі комиссияның есебіне сәйкес, Тұманды Альбион тағы бір энергетикалық дағдарысты бастан кешуі мүмкін, деп хабарлайды Kazinform тілшісі.
Energy UK, Citizens Advice және Британ өнеркәсіп конфедерациясының сарапшыларынан тұратын топ елдің энергетикалық жүйесіндегі осал тұстарын тізбеледі. Олар: газға тәуелділік, жаңартылатын энергия көздерін жетілдірмеу және энергияға сұранысты қанағаттандыру бағытындағы жұмыстардың жеткіліксіздігі.
Комиссия осы жылдың басында 2021-2022 жылдардағы энергетикалық дағдарыстың Ұлыбритания үй шаруашылықтары мен кәсіпорындарына тигізген кері әсерін бағалау үшін құрылған болатын. Бұл дағдарыстың Украинадағы жағдаймен шиеленісіп, энергия бағасының күрт өсуіне әкелгені белгілі. Осы кезеңде Ұлыбритания жылыту және электр энергиясын өндіруде газға тәуелділіктен Еуропада көш бастаған елдердің бірі болды.
Есепте, сонымен қатар, Ұлыбритания тұрғын үй қорының энергия тиімділігін арттыру бағытында баяу ілгерілеп жатқаны баяндалған. Сондай-ақ жаңартылатын энергия көздерін кеңейту мүмкіндіктері қаперден тыс қалғаны туралы да айтылған.
Нәтижесінде британиялық үй шаруашылықтары айтарлықтай қаржылық қиындықтарға тап болды: он адамның тоғызы энергияны тұтынуды азайтып, 7,5 миллионы жанармай тапшылығына кезікті. Кәсіпорындар да зардап шегіп отыр. Олардың кейбірі жұмысын тоқтатты, ал басқалары энергия шығындарының өсуімен күресу үшін жиған ақшалай қорларын жаратты.
Комиссия үкіметтің тұрақсыз газ нарықтарына тәуелділікті азайту және отандық жаңартылатын энергия көздерін пайдалануды ынталандыру бағытында шұғыл шаралар қабылдауға шақырып отыр. Ол сондай-ақ осал топтарға жататын үй шаруашылықтары мен кәсіпорындарды қолдау бағдарламаларын жақсартуға, сондай-ақ үйлерді жылы ұстау үшін энергия тиімділігін арттыруға үндеді.
