Өңірлердегі бағаға шолу: Сары май қанша тұрады
АСТАНА. KAZINFORM – Биыл маусымда статистика көрсеткендей елімізде табиғи сары май бағасының өскені байқалды. Ал қазір өңірлерде сары май қаншадан сатылып жатыр? Kazinform агенттігі бағаға шолу жасаған еді.
Осы айдағы (қыркүйек) мәліметке сүйенсек, елорда дүкендерінің сөрелерінде бір келі табиғи сары майдың бағасы өндірушіге байланысты 2500 теңгеден 6900 теңгеге дейін барады.
Түркістанда бір келі май 3500-4000 теңге тұрады, Қарағандыда дүкен майының келісі 5500 теңге, ал қолдың майының келісі 6500-7000 теңгеден сатылып жатыр.
Аталған сүт өнімінің келесі өңірлердегі бағасы шамалас, яғни Атырау мен Алматыда бір келі сары май (өндірушіге байланысты) 3800-7000 теңге аралығында, Қонаев қаласында 3900 теңгеден, ал Шымкентте бір келі сары майға 4000 теңге жұмсайсыз.
Қостанай тұрғындары сары майдың келісін 4000-6500 теңге аралығында сатып алып жатыр.
Таразда бір келі сары майдың бағасы 4500 теңгеден басталады, ал Талдықорғанда 4500-5000 теңгеден сатылады.
Ақтау дүкендерінде бұл өнімнің бағасы біршама қымбат, яғни келісі 4700-5000 теңге, сондай-ақ Павлодар мен Көкшетау дүкендерінде де арзан емес, бір келі сары майға 5000-6000 теңге төлейсіз.
Петропавлда майдың келісі 5500 теңге, ал Ақтөбеде келісі 5500-6000 теңгеге сатылады. Қызылорда тұрғындары үшін сары майдың бағасы 5600 теңгеден басталады.
Елімізде ең қымбат сары май Орал, Жезқазған, Семей және Өскемен қаласында сатылады екен. Аталған өңірлерде баға – 6000 теңге.
