«Сәтті қадам» арқылы түлектер ұлттық компаниялардан тағылымдамадан өтеді
Еске сала кетейік, аталған жоба елімізде үш жыл бойы табысты жүзеге асып келеді. Соңғы жылдары «Сәтті қадам» жобасы екі кезең бойынша жүргізілді. Атап айтқанда, бірінші кезеңде ЖОО және колледж түлектерінің қатарындағы жетім балаларды жұмысқа орналастыру қарастырылған болатын. Екінші кезеңде тағылымдамаға баратындардың тағдыры шешіледі.
Атап өтерлігі, «Сәтті қадам» жобасы - бұл жоғары оқу орындары мен колледждердің түлектері үшін өз мансап жолдарын Қазақстанның ірі ұйымдары, ұлттық компаниялар, түрлі министрліктер мен ведомстволардан тағылымдама өтуден бастауға бірегей мүмкіндік болып табылады. Жоба аясында «ҚазМұнайГаз» АҚ, «Қазақстан темір жолы» АҚ, «ҚазАгро» АҚ, «Бәйтерек» Ұлттық басқарушы холдингі АҚ, «Қазпочта» АҚ, «Қазақтелеком» АҚ, «KAZNEXInvest» АҚ, «Қазатомөнеркәсіп» ҰАК» АҚ сияқты еліміздің 350 ең ірі ұлттық компаниялары мен мемлекеттік органдарында қатысушыларға тағылымдамадан өту ұсынылады.
Үміткерлермен сұхбатты бірнеше адамнан тұратын тұрақты комиссия қабылдайды. Бұл ретте қатысушылардың тек білім деңгейі ғана емес, сөз сөйлеу шешендігі, ашықтығы, білім мен жұмысқа ынтасы, адамдармен қарым-қатынасы да тексеріледі. Ал іріктеуден өткен түлектер тағылымдамадан өткенге дейін ұжыммен жақсы қарым-қатынас орнату үшін әртүрлі тақырыптағы семинар-тренингтерге де қатысатын болады.
Басты ерекшелік - қазіргі кезде еңбек өтілімінсіз жұмысқа орналасу оңай емес. Сондықтан «Сәтті қадам» жобасы жоғары оқу орнын бітірген жастар үшін үлкен мүмкіндік.
Жоба жүзеге аса бастаған 2013 жылдан бері 5 мыңға тарта өтінім қабылданып, ЖОО мен колледждердің 1669 түлегі еліміздің ірі мекемелерінде тағылымдамадан өткен. 2015 жылы жобаға қатысуға еліміздің барлық өңірлерінен 1607 адам ниет білдірген екен. Оның 980-і сұхбаттасуға шақырылып, 385 адам тағылымдамадан өтті. Соның ішінде 15 адам тағылымдамадан өткен мекемелерде қалып, жұмысқа орналасқан.